मडगाव: तियात्र कला प्रकाराला युनेस्कोचा दर्जा प्राप्त करून देण्यासाठी राज्य सरकार विशेष प्रयत्न करणार असून आगामी अधिवेशनात या बाबतचा ठराव संमत करण्यात येणार आहे. मुख्यमंत्री डॉ. प्रमोद सावंत यांनी हे आश्वासन तियात्र अकादमीच्या शिष्टमंडळाला दिले आहे.

तियात्र अकादमीचे अध्यक्ष अॅन्थनी बार्बोझा यांच्या अध्यक्षतेखालील शिष्टमंडळाने मुख्यमंत्री डॉ. प्रमोद सावंत यांची भेट घेत विविध मागण्यांचे निवेदन सादर केले. यावेळी गोव्‍यातील तियात्राच्‍या विकासाला गती मिळण्‍यासाठी सरकारने फंड वाढवून द्यावा, अशीही मागणी करण्‍यात आली. मागण्यांचा विचार करून त्या सोडविण्याचे आश्वासन मुख्यमंत्री डॉ. प्रमोद सावंत यांनी दिल्याची माहिती अध्यक्ष अॅन्थनी बार्बोझा यांनी दिली. तियात्र कला हे गोव्याचे वैशिष्ट्य आहे. ही कला राष्ट्रीय तसेच आंतरराष्ट्रीय स्तरावर पोचवण्याचे प्रयत्न सरकार करणार आहे.

अर्थसंकल्पात तियात्र अकादमीसाठी अधिक निधीची तरतूद केली जाईल. तियात्र कलाकारांना पद्मश्री पुरस्कारासह इतर राष्ट्रीय सन्मान मिळावेत, यासाठीही सरकारद्वारे प्रयत्न केले जातील असे ते म्हणाले. मुख्यमंत्र्यांची भेट घेणाऱ्या शिष्टमंडळात उपाध्‍यक्ष मार्कुस गोन्‍साल्‍वीस, फादर डॉएल डायस, अवितो पिरिस दी मिनेझिस, प्रदीप नाईक, जिजस आंताव, विल्यम फर्नांडिस, आपोलिना रिबेलो, आंतोनेत डिसोझा, पेद्रू वाझ, सायमन रिबेलो, सदस्य सचिव सुरेश दिवकर, विन्सी क्‍वॉद्रूश यांचा समावेश होता.