पणजी : गोव्यात सध्या वीजेच्या टंचाईमुळे लोड शेडिंगचं संकट गडद होऊ लागलं आहे. सातत्याने होणाऱ्या लोड शेडिंगमुळे गोव्यातील उद्योगधंद्यांचं कामही प्रभावित होऊ लागलं आहे. अखेर उद्योग संघटनांच्या मागणीनुसार खुल्या बाजारातून दररोज 120 मेगावॅट वीज खरेदी करण्यास मुख्यमंत्री प्रमोद सावंत यांनी मंजुरी दिली आहे. (CM Pramod Sawant gives nod to purchase 120mw from open market)

वीजटंचाईमुळे गोव्यात सध्या भारनियमनाचं संकट दिवसेंदिवस गडद होत चाललं असतानाच अनेक ठिकाणी विजेचा लपंडावही सुरु आहे. गोमंतकीय जनतेची भारनियमनापासून सुटका करण्यासाठी वीजमंत्री सुदिन ढवळीकर यांनी खुल्या बाजारातून वीज खरेदीसाठी सरकार तयार असल्याचा प्रस्ताव दिल्याचं स्पष्ट केलं होतं. हा प्रस्ताव मुख्यमंत्री डॉ. प्रमोद सावंत यांच्याकडे मंजुरीसाठी पाठवण्यात आला होता. आज मुख्यमंत्र्यांनी 120 मेगावॅट वीज खरेदी करण्यासाठी मंजुरी दिली आहे.

सद्यस्थितीत गोवा राज्याला अतिरिक्त 100 मेगावॅट विजेची आवश्यकता आहे. ही वीज सामान्य दरापेक्षा जास्त दराने खरेदी करावी लागणार आहे. या अतिरिक्त दराच्या विजेसाठी उद्योजकांनी परवानगी दिली असून खुल्या बाजारातून वीज खरेदी केलेल्या ट्रेड पावरचा अतिरिक्त खर्च सहन करण्याची संमती उद्योजकांनी दर्शवली आहे. भारनियमनामुळे राज्यातील उद्योग संकटात सापडले आहेत. आता मुख्यमंत्र्यांनी खुल्या बाजारातून वीज खरेदीसाठी मंजुरी दिल्यामुळे गोव्यातील उद्योगांना तुर्तास दिलासा मिळणार आहे.