गोव्यात अतिरिक्त 'वीज' दर देण्यास उद्योजकांची मान्यता

पणजी: सद्यस्थितीत राज्याला अतिरिक्त 100 मेगावॅट विजेची आवश्यकता आहे. ही वीज सामान्य दरापेक्षा जास्त दराने खरेदी करावी लागणार आहे. या अतिरिक्त दराच्या विजेसाठी उद्योजकांनी परवानगी दिली असून खुल्या बाजारातून वीज खरेदी केलेल्या ट्रेड पावरचा अतिरिक्त खर्च सहन करण्याची संमती उद्योजकांनी दर्शवली आहे.भारनियमनामुळे राज्यातील उद्योग संकटात सापडले आहेत.

यासाठी वीज मंत्री सुदिन ढवळीकर यांच्या अध्यक्षतेखाली गोवा उद्योजक असोसिएशनने पुढाकार घेऊन विविध संघटनांची बैठक बोलावली होती. यावेळी चेंबर ऑफ कॉमर्स अँड इंडस्ट्रीचे अध्यक्ष राल्फ डिसोजा, गोवा फार्मास्युटिकल मॅन्युफॅक्चरर्स असोसिएशनचे प्रवीण खुल्लर उपस्थित होते. यात सरकार अतिरिक्त दराने वीज खरेदी करणार असल्यास हा अतिरिक्त खर्च उचलण्याची तयारी दर्शवली आहे. विजेसाठी जनरेटर चालवल्यामुळे आर्थिक नुकसान होण्याबरोबर पर्यावरणाचीही मोठी हानी होत आहे हे लक्षात घेऊन उद्योग संघटनांनी ‘अंतरिम स्टॉप गॅप’ वेळची व्यवस्था म्हणून हा निर्णय घेतला आहे.