पणजी : राज्यातील पर्यटन वाढीसाठी ‘क्रूझ टर्मिनल’ला प्रोत्साहन देण्यात येईल. यासाठी केंद्र सरकारकडून भरीव मदत मिळेल अशी आशा मुख्यमंत्री प्रमोद सावंत यांनी व्यक्त केली आहे. मुख्यमंत्र्यांनी केंद्रीय जहाज, बंदर, जलमार्ग आणि आयुषमंत्री सर्वानंद सोनोवाल यांची भेट घेऊन विविध विषयांवर चर्चा केली. त्यानंतर त्यांनी ही माहिती दिली आहे.

याबाबत अधिक माहिती देताना मुख्यमंत्री म्हणाले, आज केंद्रीय जहाज, बंदर, जलमार्ग आणि आयुषमंत्री सोनेवाल यांच्याशी विविध विषयांवर झालेली चर्चा फलदायी ठरली आहे. राज्यात जहाज, बंदर आणि जलमार्ग मंत्रालयाशी संबंधित विविध कामे सुरू आहेत. यातील सागरमाला अंतर्गत येणाऱ्या कामांनाही प्रोत्साहन देण्यात येणार असून पणजी आणि वास्को येथे ‘क्रूझ टर्मिनल’ उभा करण्यासाठी प्रयत्न केले जाणार आहेत.

याशिवाय आयुष मंत्रालयाच्यावतीने देशातील पहिले आणि सर्व सोयींनी युक्त रुग्णालय उभारण्यात येत आहे. या रुग्णालयाचे काम अंतिम टप्प्यात असून जूनपर्यंत ते पूर्ण करण्यात येईल याचा राज्यातील जनतेला कसा उपयोग करता येईल यासाठीही प्रयत्न केले जाणार आहे, असेही मुख्यमंत्र्यांनी म्हटले आहे.

केंद्रीय पर्यटन राज्यमंत्री श्रीपाद नाईक यांच्याकडे आयुष मंत्रालयाचा स्वतंत्र प्रभार होता. त्यावेळी कोलवाळ येथे या मंत्रालयाकडून पहिले अत्याधुनिक सोयीचे रुग्णालय उभे करण्यात येत आहे. हे रुग्णालय जून महिन्याच्या सुरवातीपासून राज्यातील जनतेसाठी उपलब्ध करण्याचा केंद्र आणि राज्य सरकारचा प्रयत्न आहे. या रुग्णालयाचे काम अंतिम टप्प्यात आहे. ते सुरू झाल्यास आयुर्वेदच्या उपचार पद्धती सुरू होतील.