डिचोली: प्रशासकीय कामानिमित्त येणाऱ्या डिचोली तालुक्यातील जनतेला चांगली आणि तत्पर सेवा मिळावी, यासाठी मामलेदारसह उपजिल्हाधिकारी कार्यालयात आवश्यक कर्मचारी नियुक्त करतानाच या कार्यालयांनी अन्य सुविधा उपलब्ध करुन देण्यात येतील. तसेच नियोजित प्रशासकीय ब्लॉक प्रकल्पाची लवकरच पायाभरणी करण्यात येणार असल्याचे मुख्यमंत्री डॉ. प्रमोद सावंत यांनी सांगितले.

आमदार डॉ. चंद्रकांत शेट्ये आणि प्रेमेंद्र शेट यांच्यासह मुख्यमंत्री डॉ. सावंत यांनी डिचोलीच्या मामलेदार कार्यालयाला भेट देऊन मामलेदारांकडून कार्यालयातील वस्तूस्थिती जाणून घेतली. रिक्त असलेली सर्वेअर, तलाठी ही पदे लवकरच भरण्यात येईल. असे मुख्यमंत्री डॉ. प्रमोद सावंत (Chief Minister Dr. Pramod Sawant) यांनी स्पष्ट केले. प्रशासकीय ब्लॉक प्रकल्पात ''कला भवन'' उभारण्याचा प्रस्ताव असल्याचेही मुख्यमंत्री म्हणाले. दरम्यान, भाडेपट्टीवर कार्यरत असलेल्या कार्यालयांची नोंद करुन अहवाल तयार करा. असे निर्देश मुख्यमंत्री डॉ. सावंत यांनी मामलेदारांना दिले.

शहरातील पोलिस स्थानकाची जुनी इमारत मोडून त्याठिकाणी 80 कोटी रुपये खर्च करुन प्रशासकीय ब्लॉक प्रकल्प बांधण्यात येणार आहे. त्या पार्श्वभूमीवर मुख्यमंत्री डॉ. सावंत यांनी नियोजित प्रकल्पाच्या आराखड्याची पाहणी करुन आढावा घेतला. 2027 पूर्वी प्रशासकीय ब्लॉक प्रकल्पाचे काम पूर्ण करण्यात येण्याचे लक्ष्य ठेवण्यात आले असून, लवकरच या प्रकल्पाची पायाभरणी करण्यात येणार आहे. हा प्रकल्प पूर्ण होताच सर्व प्रशासकीय कार्यालये एकाच छताखाली येणार आहेत. भाडेपट्टीवर कार्यरत असलेली कार्यालये या इमारतीत आणण्यात येणार असल्याचे मुख्यमंत्र्यांनी सांगितले.