पणजी : आम आदमी पक्षाने भंडारी समाजाचा नेता मुख्यमंत्रिपदाचा उमेदवार जाहीर करणे चूक होते. त्यामुळेच मी अस्वस्थ बनलो आणि त्याच कारणासाठी पक्षाशी फारकत घेतली आहे, असे मत या पक्षाचे भूतपूर्व निमंत्रक राहुल म्हांबरे यांनी व्यक्त केले. (Rahul Mhambare News)

एका वेबपोर्टलशी बातचित करताना राहुल म्हांबरे पुढे म्हणाले की, निवडणुकीच्या (Election) काळात मी या प्रकाराविरोधात पक्षाच्या नेत्यांकडे अस्वस्थता व्यक्त केली होती. परंतु त्याबाबत मी जाहीरपणे बोललो नाही; कारण पक्षात फूट पडली असती. ‘अमूकच जातीचा मुख्यमंत्रिपदाचा (CM) उमेदवार जाहीर करणे आम आदमी पार्टीला महागात पडले. अनेकजण त्यामुळे रागावले व बुद्धिवादीसुद्धा या पक्षापासून दूर गेले.’ असंही ते म्हणाले.

राहुल म्हांबरे म्हणाले, पक्षाने अनेक योजना जाहीर केल्या होत्या. वीज आणि पाणीपट्टी कमी करणे, तीर्थयात्रा अशा काही योजना होत्या. परंतु भंडारी समाजाचा मुख्यमंत्री ही कल्पना लोकांना रुचली नाही. त्यामुळे या योजनांनाही यश मिळाले नाही.

मी भ्रष्टाचारविरोधी आंदोलनापासून आम आदमी पक्षाच्या (Aam Aadmi Party) विचारांबरोबर आहे. मी फारकत घेतल्यानंतर काही पक्षांनी मला आमंत्रणही दिले आहे. परंतु मी सध्या कोणत्याही पक्षात प्रवेश करण्याच्या विचारात नाही. आम आदमी पक्षाने आपल्या संकल्पना पुढे घेऊन जाव्यात. तूर्तास मी मागे बसून त्यांच्या हालचालींकडे लक्ष ठेवणार आहे, असे राहुल म्हांबरे म्हणाले.