सासष्टी: माझ्याकडे पोर्तुगीज पासपोर्ट आहे व मी पोर्तुगीज नागरिक असा जो आरोप फ्रॅंकी डिमेलो नामक इसमाने केला आहे, त्यात मुळीच तथ्य नाही. माझ्याकडे भारतीय पासपोर्ट आहे व मी भारताचा नागरिक आहे. ज्याने हे आरोप केले आहेत ते कुणाच्या सांगण्यावरून, असे काँग्रेस पक्षाचे (Goa Congress party) राज्य कार्यकारी अध्यक्ष आलेक्स सिक्वेरा (Alex Sequeira) यांनी काल झालेल्या पत्रकार परिषदेत स्पष्ट केले.

नुवेच्या आमदाराने (Goa MLA) हे आरोप केले असते, तर मी समजू शकलो असतो, परंतु या इसमाला माझ्यावर हे खोटे आरोप करण्याचा अधिकारच नाही किंवा त्याने पुरावेही सादर केले नाहीत. त्यांचा केवळ मला निवडणूक (Goa Election) लढविण्यापासून दूर ठेवणे हा एक कलमी उद्देश असावा असे आपल्याला वाटते, असेही सिक्वेरा यांनी सांगितले.

मी पोर्तुगीज नागरिक असतो, तर 2007 ते 2012 या कालावधीत मी मंत्रीच झालो नसतो. मी आमदार व मंत्री असताना अनेकांना नोकऱ्या दिल्या व त्यांच्याकडून एका पैशाचीही अपेक्षा ठेवली नाही. माझी पोर्तुगालमध्ये कोणत्याही प्रकारची मालमत्ता नाही. गोवा सोडून इतर कुठेही तसेच मांडवी नदीच्या पलिकडेसुद्धा माझी किंवा माझ्या कुटुंबाची मालमत्ता नसल्याचे त्यांनी स्पष्ट केले.