Goa News : तिसवाडी, नेवरा पंचायतीच्या अखत्यारित सुका आणि ओला कचरा खुल्या जागेत किंवा रस्त्याच्या बाजूला फेकला जात असून यामुळे नेवरावासीय त्रस्त आहेत.

कचरा फेकणाऱ्या व्यक्तींना पकडण्यासाठी सीसीटीव्ही कॅमेरा बसवण्यात यावेत, तसेच एखादा व्यक्ती सापडल्यास कठोर कारवाई करत त्याच्या घराची वीज आणि पाणी जोडणी कापण्यात यावी, अशी मागणी नेवरा पंचायतीच्या ग्रामसभेत नेवरावासियांनी केली.

प्लास्टिक आणि सुका कचरा जाळण्यास येत असल्याने याचा त्रास मुले आणि वृद्धांना होत आहे. नेवरा पंचायतीच्या अखत्यारित कचरा जाळताना कोणीही आढळल्यास त्या व्यक्तींवर कारवाई करण्यात यावी. केवळ दंड न करत वारंवार कचरा जाळणाऱ्यांवर कठोर कारवाई झाली पाहिजे, असे मत ग्रामस्थांनी व्यक्त केले.

कचरा फेकणारे व्यक्ती परप्रांतीय असतात आणि कचरा फेकून ते पळ काढतात, असे उत्तर पंच सुनीता नाईक यांनी दिले. यावर ग्रामस्थांनी संताप व्यक्त केला. पंचायतीला आपली जबाबदारी टाळता येणार नाही, असे यावेळी ग्रामस्थांनी सांगितले.

रात्रीच्या वेळी अनेक अनोळखी व्यक्ती फिरताना दिसतात, मात्र आगशी पोलिसांकडून गस्त घालण्यास संख्याबळ कमी आहे, असे कारण दिले जाते.

यावर ग्रामसभेत चर्चा झाली. येथे भाडेपट्टीवर राहत असलेले काहीजण रात्रीच्या वेळी बाहेर फिरताना दिसतात. त्यामुळे भाडेपट्टीवर राहणाऱ्यांची माहिती पोलिसांना दिली आहे की नाही याची शहनिशा होणे गरजेचे आहे, असा विषय ग्रामसभेत मांडला गेला.

रात्रीच्या वेळी काही अनोळखी व्यक्ती फिरतात, याची माहिती आगशी पोलिसांना दिली गेली आहे. परंतु गस्तीसाठी पोलिसांचे संख्याबळ कमी असल्याचे सांगण्यात येते. आता देखील अनेक व्यक्ती गावांत आढळतात. अनोळखी व्यक्तीला पंचायतीची परवानगी घेतली आहे की नाही याचा पुरावा दिल्याशिवाय त्यांना घरात प्रवेश द्यायचा नाही.

-ॲड. होनारिना आरावजो, सरपंच, नेवरा