Goa Mining Case: बेकायदा खनिज वाहतुकीविरोधात मयेवासीयांनी एल्गार केला खरा; परंतु प्रशासनाने पोलिस बळाच्या जोरावर हे आंदोलन आज मोडून काढले. मयेतील संतप्त लोकांनी आज खनिज वाहतूक रोखून धरली. मात्र, डिचोली उपजिल्हाधिकाऱ्यांच्या आदेशानुसार एका तासातच पोलिस बंदोबस्तात खनिज वाहतूक पुन्हा सुरू केली.

यावेळी खनिज वाहतुकीला विरोध करणारे गोवा फॉरवर्डचे सचिव संतोष सावंत यांच्यासह सहा आंदोलनकर्त्यांना पोलिसांनी अटक केली होती. मात्र, सायंकाळी त्यांना सोडण्यात आले. गेल्या सोमवारपासून (ता. ८) पैरा खाणीवरून ई-लिलावातील खनिजाची वाहतूक सुरू झाली आहे. पैराहून मये गावातील अंतर्गत रस्त्यावरून ही वाहतूक करण्यात येत आहे.

‘ब्ल्यूग्लोब’ या कंपनीने खनिज वाहतुकीचे कंत्राट घेतले आहे. एप्रिल २०२२ मध्ये मयेतील अंतर्गत रस्त्याने खनिज वाहतूक करण्यास उच्च न्यायालयाने स्थगिती दिली आहे. तरीदेखील मयेत अंतर्गत रस्त्याने खनिज वाहतूक करण्यात येत आहे.

अंतर्गत रस्त्याने खनिज वाहतूक नकोच, या मागणीवर ठाम असलेले संतप्त मयेवासीय आज (शनिवारी) पुन्हा रस्त्यावर उतरले. आज सकाळी या आंदोलनकर्त्यांनी केळबायवाडा येथे खनिज वाहतूक करणारे काही ट्रक अडविले.

परंतु खनिज वाहतूक रोखल्याची माहिती मिळताच घटनास्थळी मोठा पोलिस फौजफाटा दाखल झाला. तसेच डिचोलीचे उपजिल्हाधिकारी रोहन कासकर यांच्यासह मामलेदार अभिजीत गावकर, श्रीपाद माजिक, पोलिस निरीक्षक दिनेश गडेकर आंदोलनस्थळी दाखल झाले.

उद्या उग्र आंदोलन

प्रशासनाने आज जरी पोलिस बळावर आंदोलन चिरडले असले, तरी आम्ही न्यायालयाच्या आदेशाशी सहमत आहोत.

मये गावातून खनिज वाहतूक होऊ देणार नाही. उद्या सोमवारी सर्व ताकदीनिशी यापेक्षाही उग्र आंदोलन छेडण्यात येईल, असा इशारा देण्‍यात आला.

पोलिस बळाने विरोध मोडीत

उपजिल्हाधिकाऱ्यांच्या आदेशानुसार पोलिस बंदोबस्तात खनिज वाहतूक सुरू होताच आंदोलनकर्त्यांनी रस्त्यावर मधेच उभे राहून ट्रक अडविण्याचा प्रयत्न केला. त्यावेळी गोवा फॉरवर्डचे सचिव तथा स्थानिक नेते संतोष सावंत यांच्यासह सहाजणांना पोलिसांनी ताब्यात घेतले. यात अजित सावंत, नागेश नाईक, बाबूसो कारबोटकर, श्रीराम साळगावकर आणि मालवणकर यांचा समावेश होता. त्यांची सायंकाळी मुक्तता करण्यात आली.