पणजी (Goa Politics) : राष्ट्रवादी काँग्रेस पक्षाने गोवा विधानसभेच्या (Goa Assembly) सभापतींसमोर त्यांचे आमदार चर्चिल आलेमांव (Churchill Alemao) यांनी पक्षाचे विधीमंडळ तृणमूल काँग्रेस (TMC) पक्षात विलीन करण्याचा दावा केल्याबद्दल अपात्रतेची याचिका दाखल केली आहे.

राष्ट्रवादी काँग्रेस (NCP) अजूनही अस्तित्वात असून तो विलीन झालेला नाही. त्यामुळे आलेमांव यांनी केलेला दावा घटनेचे उल्लंघन करणारे आहे. त्यामुळे त्याना अपात्र ठरविण्याची विनंती याचिकेत केली आहे.

आलेमांव यांनी सोमवारी सभापती राजेश पाटणेकर यांना पत्र देऊन राष्ट्रवादी काँग्रेसच्या गोवा विधानमंडळ गट तृणमूल काँग्रेसमध्ये विलीनीकरण केल्याची माहिती दिली होती. नंतर दिवसभरात आलेमांव अधिकृतपणे ममता बॅनर्जी (Mamata Banerjee) यांच्या नेतृत्वाखालील तृणमूल काँग्रेस (TMC) पक्षात सामील झाले होते. त्यामुळे राष्ट्रवादी काँग्रेसचे गोवा अध्यक्ष जुझे फिलीप डिसोझा यांनी भारतीय संविधानाच्या 10 व्या अनुसूचीच्या तरतुदीनुसार सभापतींसमोर अपात्रतेची याचिका दाखल केली आहे.