पणजी: चोडण धक्क्यावर रात्री नांगरलेली असताना महिनाभरापूर्वी बुडालेली बेती फेरीबोट आता पाण्यातून बाहेर काढून दुरुस्त करण्यात आली असून पुन्हा सेवेत दाखल झाली आहे.

महिनाभरापूर्वी झालेल्या या दुर्घटनेनंतर फेरीबोटला पाण्याखालून सुरक्षितरीत्या बाहेर काढून मरिन वर्कशॉपमध्ये दुरुस्ती करण्यात आली. आवश्यक दुरुस्ती पूर्ण होताच ती पुन्हा पाण्यात उतरवण्यात आली व चोडण येथून सेवेला सुरवात करण्यात आली.

या घटनेबाबत सरकारच्या मंजुरीनंतर विभागीय (खात्यांतर्गत) चौकशी सुरू करण्यात आली आहे. चौकशीत दुर्घटनेचे कारण, देखभाल व्यवस्थेतील त्रुटी आणि जबाबदारी निश्चित केली जाणार असल्याची माहिती मिळाली आहे.

स्थानिक प्रवाशांच्या सुरक्षिततेसाठी अशा घटनांची पुनरावृत्ती टाळण्यावर भर देण्याची मागणी नागरिकांकडून होत आहे.