पणजी: चिंबल येथे पाणथळ जमिनीत सरकार युनिटी मॉल आणि प्रशासन स्तंभ उभारू इच्छित आहे. परंतु यामुळे स्थानिक जैवविविधतेला धोका पोहोचणार असून ग्रामस्थांनादेखील विश्‍वासात घेतले गेलेले नाही. उद्या या प्रकल्पाचे आभासी पद्धतीने उद्‌घाटन होणार आहे; परंतु प्रकल्पाला आमचा विरोध कायम असल्याचे गोविंद शिरोडकर यांनी सांगितले.

आझाद मैदान येथे आयोजित पत्रकार परिषदेत शिरोडकर बोलत होते. यावेळी चिंबल ग्रामस्थदेखील उपस्थित होते. दरम्यान, शिरोडकर म्हणाले, पोर्तुगीज कालखंडात ज्यावेळी पणजीला पाणी अपुरे पडले त्यावेळी चिंबलमधील तळ्याने पणजीवासीयांची तहान भागविली आहे.

ज्यावेळी पणजीला पाण्याची गरज लागेल त्यावेळी या तळ्याद्वारे ती भागविण्यात येणार आहे. सरकार चिंबल येथे जो प्रकल्प आणू इच्छित आहे त्यासाठी त्यांना स्थानिकांच्या जमिनीच दिसत आहेत.

जर सरकारला वाटते की युनिटी मॉल आणि प्रशासन स्तंभ चिंबलमध्ये व्हावा तर तो इंदिरानगर येथे उभारण्यात यावा. जैवविविधतेची हानी करून हे आम्हाला प्रकल्प नकोत, असे अजय खोलकर यांनी सांगितले.