राज्यातील वाढत्या गुन्हेगारीला काही परप्रांतीय जबाबदार असल्याचे विधान मुख्यमंत्र्यांनी हल्लीच झालेल्या कामगारदिन कार्यक्रमात केले होते. ते विधान योग्य आहे.

कारण काही बेशिस्त परप्रांतीय कामगार गुन्हेगारीमध्ये अटक झालेले आहेत. सर्वच परप्रांतीय नाही. मात्र, काहीजण त्याला जबाबदार असल्याचे मत वीजमंत्री सुदिन ढवळीकर यांनी व्यक्त केले.

गोव्यात कामगार मिळणे कठीण आहे. सुतारकाम, लाद्या बसवणे, गवंडी, बांधकामासाठी लागणारे मजूर हे यापूर्वी कंत्राटदार बिहार, उत्तरप्रदेश, आंध्रप्रदेश तसेच काही महाराष्ट्रातूनही आणले जात होते. हे काम करणारे गोव्यात मजूर मिळत नव्हते.

काही परप्रांतीयांनी स्वतःच्या मेहनतीने आपला व्यवसायही सुरू केला आहे. काही राज्यात रोजगार मिळत नसल्याने ते गोव्याकडे धाव घेत आहेत. गोव्याकडे येणाऱ्या या मजुरांना कामापोटी चांगले पैसे मिळत असल्याने त्यातील काहीजण व्यसनी होत आहेत.

त्यामुळे राज्यात त्यांच्यामुळेच अनेक गुन्हे नोंदवले जात आहेत. या परप्रांतीय मजुरांमुळे गोव्याचे नाव मात्र बदनाम होत आहे. त्यामुळे मुख्यमंत्र्यांनी जे विधान केले ते त्याला अनुसरूनच केले आहे, असे मत त्यांनी व्यक्त केले.

‘मजूर वळतात गुन्हेगारीकडे’

राज्यात येणारे परप्रांतीय हे चांगले व वाईटही असतात. इतर राज्यातील काही अधिकारीही उच्च पदावर आहेत. मात्र, मजूर वर्गातील लोक हे वाईट मार्गाला लागून ते गुन्हेगार बनत आहेत. त्यामुळे गोव्यात आलेल्या अशा मजुरांना ओळखपत्र सरकारने सक्तीचे केले आहे ते योग्य आहे.

ते ओळखपत्र नसल्यास त्यांना कंत्राटदारांनी कामावर ठेवू नये. काम नसल्याने काहीजण गुन्हेगारीकडे वळत आहेत, असे सुदिन ढवळीकर यांनी सांगितले.