सावर्डे: बहुचर्चित छावा या चित्रपटाची जादू सध्या सगळीकडेच आहे. दक्षिण गोव्यातील सावर्डे येथे मंगळवारी (दि . १८) बजरंग दलाने स्थानिकांसाठी छावा चित्रपट दाखवण्याचा उपक्रम राबवला. या उपक्रमाला सावर्डे येथून उत्तम प्रतिसाद मिळाला आहे. चित्रपटानंतर बजरंग दल सावर्डेचे युवा नेता संकेत अर्सेकर यांनी माध्यमांशी संवाद साधला.

बजरंग दल सावर्डेचे युवा नेता संकेत अर्सेकर यांनी चित्रपटाबद्दल बोलताना सांगितले की छत्रपती संभाजी महाराजांनी सोसलेल्या चाळीस दिवसांच्या यातना या चित्रपटात केवळ तीन तासांत मांडण्यात निर्माते यशस्वी झाले आहेत.

छत्रपती संभाजी महाराज यांनी दिलेलं बलिदान लोकांपर्यंत पोहोचलं पाहिजे, लोकांना खास करून तरुणांना त्यांनी दिलेल्या असामान्य बलिदानाची आठवण कायम राहावी म्हणून हा सिनेमा प्रत्येकाने बघितलंच पाहिजे. औरंगजेब शेवटपर्यंत महाराजांच्या तोंडून 'हाय' ऐकण्यासाठी वाट बघत राहिला मात्र महाराज त्याच्यासमोर झुकले नाहीत. आजच्या तरुणांनी महाराजांकडून हेच शिकण्याची गरज आहे.

सध्या राष्ट्रगीताला उभं राहायचं म्हटलं तरीही आपण मागे-पुढे पाहतो मात्र राष्ट्रप्रेम कसं असावं हे छत्रपती संभाजी महाराजांकडून शिकण्याची गरज आहे. हे राष्ट्रप्रेम तरुणांना कळावं, समजावं म्हणून खास करून तरुणांना घेऊन या चित्रपटाचा उपक्रम राबवला असं युवा नेता संकेत अर्सेकर म्हणालेत तसंच त्यांनी सर्वांना हा चित्रपट आवर्जून पाहावा अशी विनंती केली आहे.