पणजी: देश-विदेशातील पर्यटकांचे मुख्य आकर्षण असलेल्या गोव्यातील एका प्रसिद्ध समुद्रकिनाऱ्यावर एक धक्कादायक घटना घडली आहे. दक्षिण गोव्यातील मोबोर समुद्रकिनाऱ्यावर (Mobor Beach) छत्तीसगडमधील एका २७ वर्षीय तरुणाची धारधार हत्याराने वार करून निर्घृण हत्या करण्यात आली आहे. या घटनेमुळे संपूर्ण परिसरात खळबळ उडाली असून कोलवा पोलिसांनी या प्रकरणी वेगाने तपास चक्रे फिरवून खुनाचा गुन्हा दाखल केला आहे.

'द बाईक हेरिटेज' हॉटेलच्या समोर घडले हत्याकांड

मिळालेल्या माहितीनुसार, ही रक्ताळलेली घटना मोबोर बीचवरील 'द बाईक हेरिटेज' (The Byke Heritage) आणि 'ओल्ड अँकर' रिसॉर्ट परिसराच्या अगदी समोर घडली. शशी लकडा (वय २७, रा. छत्तीसगड) असे मृत तरुणाचे नाव आहे.

या प्रकरणी छत्तीसगडमधील सुरगुजा येथील रहिवासी रोशन राम लकडा यांनी कोलवा पोलीस ठाण्यात अधिकृत तक्रार दाखल केली आहे. समुद्रकिनाऱ्यासारख्या सार्वजनिक ठिकाणी झालेल्या या हत्याकांडामुळे पर्यटकांच्या सुरक्षेचा प्रश्न पुन्हा एकदा ऐरणीवर आला आहे.

हत्याराने थेट गळ्यावर वार; जागीच मृत्यू

फिर्यादी रोशन लकडा यांनी दिलेल्या तक्रारीनुसार, संशयित आरोपी संजय मांझी (वय ३०), आशिष कुमार (वय १८) आणि जगनंदन सिदार (वय २२) यांनी पूर्ववैमनस्यातून किंवा किरकोळ वादातून शशी लकडा याच्यावर हल्ला केला. संशयितांनी शशीच्या गळ्याच्या डाव्या बाजूला हत्याराने गंभीर वार केले. हा वार इतका भीषण होता की, अतिरक्तस्रावामुळे शशीचा मृत्यू झाला.

तपास सुरू

घटनेची माहिती मिळताच कोलवा पोलिसांनी तत्काळ घटनास्थळी धाव घेत मृतदेह ताब्यात घेतला आणि शवविच्छेदनासाठी रुग्णालयात पाठवला. पोलिसांनी रोशन राम लकडा यांच्या तक्रारीवरून तिन्ही मुख्य संशयित आरोपींवर हत्येचा (भारतीय न्याय संहितेनुसार) गुन्हा दाखल केला आहे. हे सर्वजण छत्तीसगडचेच राहणारे असून ते गोव्यात कशासाठी आले होते आणि त्यांच्यात नक्की कोणत्या कारणावरून वाद झाला, याचा सखोल तपास पोलीस करत आहेत.