The Central Pollution Control Board: प्लास्टिक कचरा व्यवस्थापन नियमाचे पालन न केल्यामुळे गोव्यातील दोन आस्थापनांना कारणे दाखवा नोटीस जारी करण्यात आली आहे. केंद्रीय प्रदूषण नियंत्रण मंडळाने ही कारवाई केली केली आहे.

मंडळाने गोव्यातील दोन संस्थांसह भारतभरातील एकूण 688 संस्थांना पुढील कृती करण्यासाठी कारणे दाखवा नोटीस बजावली आहे.

उपलब्ध माहितीनुसार, होंडा सत्तरी येथील स्वानसन प्लॅस्टिक (इंडिया) प्रायव्हेट लिमिटेड आणि पिळर्ण औद्योगिक वसाहतील जीकेबी व्हिजन प्रायव्हेट लिमिटेड या दोन आस्थापनांना केंद्रीय प्रदूषण नियंत्रण मंडळाचा दणका बसला असून त्यांना कारणे दाखवा नोटीस बजावण्यात आली आहे. याबाबत पर्यावरण नुकसान भरपाई नियमानुसार 5000 रुपये प्रति टन दंड आकरण्यात आला आहे.

याबाबत अधिक माहिती अशी की, मंत्रालयाने 16 फेब्रुवारी 2022 रोजी प्लास्टिक पॅकेजिंगसाठी मार्गदर्शक तत्त्वे जारी केली होती. या मार्गदर्शक तत्त्वांमध्ये विशिष्ट संस्थांनी ईपीआर पोर्टलवर नोंदणी करणे आवश्यक आहे.

ही नोंदणी घेतल्याशिवाय या संस्थांना कोणताही व्यवसाय करण्याची परवानगी नव्हती. याचे पालन न केल्याने देशभरातील अशा संस्थांवर मंडळातर्फे कारवाई करण्यात आली आहे.