Goa Casino: पणजीतील कॅसिनोमधून एक फसवणुकीचा प्रकार समोर आला आहे. कॅसिनोमधील कर्मचाऱ्याने खोटा गेम रिपोर्ट सादर करुन गेस्टला 1.70 लाखांचा बोनस मिळवून दिला. मांडवीतील 'बिग डॅडी' कॅसिनोत हा प्रकार घडला आहे.

पणजी पोलिसांनी याप्रकरणी कर्मचाऱ्याविरोधात गुन्हा दाखल करुन त्याला अटक केली आहे.

दीपक दास (रा. मुंबई) असे अटक करण्यात आलेल्या कॅसिनो कर्मचाऱ्याचे नाव आहे.

मिळालेल्या माहितीनुसार, दीपक दासने खोटा गेम रिपोर्ट तयार करुन कॅसिनो व्यवस्थापनाकडे सादर केला. यामुळे व्यवस्थापनाला संबधित गेस्टला एक लाख 70 हजार रुपये बोनस म्हणून द्यावे लागले.

कॅसिनो प्रशासनाच्या ही बाब लक्षात आल्यानंतर कर्मचारी दास विरोधात पणजी पोलीस स्थानकात तक्रार दाखल केली. पोलिसांनी कर्मचाऱ्याविरोधात फसवणुकीचा गुन्हा नोंद करुन त्याला अटक केलीय.