Goa Jungle Juice : यंदाचा काजू पिकाचा हंगाम जवळपास संपुष्टात आला असून, काजू पिकाच्या हंगामात डिचोलीतील विविध भागांत चालणारा काजूपासून दारू गाळणीचा व्यवसायही बंद झाला आहे.

गेल्या जवळपास तीन महिन्यांहून धडधडणाऱ्या दारूभट्ट्याही आता शांत झाल्या आहेत. प्रतिकूल हवामान त्यातच अवकाळी पावसानेही कृपा केल्याने यंदा काजू व्यवसायाचा मोसम यशस्वीरीत्या पूर्ण झाला. यंदा काजू आणि दारू उत्पादनात वाढ झाल्याची माहिती बागायतदार व दारू उत्पादकांकडून मिळाली आहे.

डिचोली तालुक्यातील विविध भागांत काजू बोंडूपासून हुर्राक, काजू फेणीचे उत्पादन घेण्यात येते. डिचोलीतील काही दारू उत्पादक व्यावसायिक स्थानिक बागायतींमधून उपलब्ध होणाऱ्या काजूबोंडूसह महाराष्ट्रातील वझरे, माटणे, दोडामार्ग आदी भागातून काजूबोंडूंची आयात करून दारू गाळतात. डिचोलीत दरवर्षी काजू फेणीचे उत्पादन होते, त्यात 50 टक्क्यांहून अधिक उत्पादन हे राज्याबाहेरील काजूबोंडूंपासून होते.

गेल्या काही वर्षांच्या तुलनेत यंदा काजूपिकाबरोबरच ‘फेणी’ उत्पादनात वाढ झाली आहे. गेल्या वर्षीच्या तुलनेत यंदा उत्पादनात ३५ ते ४० टक्क्यांनी वाढ झाली आहे. तसे संकेतही बहुतेक व्यावसायिकांकडून मिळाले आहेत.

दारू गाळणी बंद

काजू पिकाच्या हंगामात तालुक्यातील सर्वण, मये, कारापूर, नार्वे, धुमासे, कुडचिरे, उसप आदी भागांत काजू बोंडूंपासून दारू गाळणीचा व्यवसाय मोठ्या प्रमाणात चालतो. साधारण तीन महिने दारूभट्ट्या पेटतात.

आता काजू हंगाम संपुष्टात आल्याने दारू गाळणीचा व्यवसाय बंद झाला असून, दारूभट्ट्यांची आगही विझली आहे. पावसाळा जवळ आल्याने काही व्यावसायिकांनी दारूभट्ट्यांवरील ‘भाण’ आदी यंत्रसामग्री काढून ती व्यवस्थित ठेवण्याकडे लक्ष केंद्रित केले आहे.

"गेल्या जवळपास दहा-बारा वर्षांनंतर यंदा काजू हंगामाचे पूर्ण दिवस व्यवसाय चालला. यंदा काजू पीक समाधानकारक आले. त्यातच अवकाळी पावसानेही फटका दिला नाही. राज्याबाहेरूनही काजूबोंडूंची आवक वाढली. त्यामुळे काजू आणि दारू उत्पादनात समाधानकारक वाढ झाली आहे."

उमेश सावंत आणि सोनू सावंत, दारू उत्पादक, सर्वण