पणजी: ‘कॅश फॉर जॉब’ घोटाळाप्रकरणी पर्वरी पोलिसांनी जुने गोवे येथील संशयित पूजा नाईक (३९) हिच्यासह तिघांविरुद्ध म्हापसा प्रथमवर्ग न्यायालयात ११३ पानी आरोपपत्र दाखल केले आहे. या आरोपपत्रात ६ साक्षीदारांचा समावेश आहे. या आरोपपत्रामध्ये प्रियोळ - म्हार्दोळ येथील संशयित अजित सतरकर (४९) व अनिशा सतरकर (४७) यांचा समावेश आहे.

या दोघांनी सरकारी खात्यात नोकरी मिळवून देण्यासाठी प्रिया मांद्रेकर हिच्याकडून ४ लाख रुपये घेतले होते. तिने स्वतःच्या पतीच्या बँक खात्यावरून ही रक्कम अजित व अनिशा सतरकर याच्या बँक खात्यावर जमा केली होती. ही रक्कम नोव्हेंबर २०२१ मध्ये दिली होती. मात्र, सरकारी नोकरी देण्यात ते अपयशी ठरले होते.

तक्रारदाराने ही रक्कम परत करण्यास सांगितली. मात्र, ती दिली गेली नाही. त्यामुळे तिने पर्वरी पोलिस स्थानकात या दोघांविरुद्ध तक्रार दाखल केली होती. पोलिस चौकशीवेळी या दोघांनी ही रक्कम संशयित पूजा नाईक हिच्याकडे सोपविली अशी महिती दिली. त्यामुळे या तिघांनाही अटक करण्यात आली होती.

पूजा नाईक हिच्या विरोधात अशा प्रकारचे अनेक गुन्हे दाखल करण्यात आले आहेत. डिचोली पोलिसांनी तिला २९ ऑक्टोबर २०२४ रोजी अटक केली होती आणि त्यानंतर पूजाला न्यायालयीन कोठडी सुनावण्यात आली. २३ ऑक्टोबर २०२४ रोजी पूजा नाईक हिने प्रिया अरविंद मणेरकरला नोकरीचे आमिष दाखवून गंडा घातल्याचे प्रकरण उघड झालं होतं आणि पर्वरी पोलिसांनी तिला ६ नोव्हेंबर २०२४ रोजी अटक केली होती.