पणजी: काल मध्यरात्री झुआरी पुलाची बाजूची रेलिंग तुटल्याने एक कार प्रवाशांसह झुआरी नदीत पडल्याची मोठी दुर्घटना घडली आहे. अग्निशमन आणि आपत्कालीन कर्मचार्‍यांसह वेर्णा व आगशी पोलिसांकडून झुआरी नदीत शोध आणि बचाव कार्य सुरू आहे. आतापर्यंत त्यांना कार शोधण्यात यश आलेले नाही.

(Car plunged into Zuari river by breaking bridge railing at midnight; search & rescue operation for car occupants underway)

नौदलाच्या डायव्हर्सची मदत घेण्यात येत असून रात्रीपासून शोध मोहीम सुरू आहे प्रत्यक्षदर्शींनी दिलेल्या माहितीनुसार, एका वाहनाला ओव्हरटेक करण्याच्या प्रयत्नात कारचे नियंत्रण सुटले आणि ती बाजूच्या रेलिंगला धडकली आणि नदीत पडली.

वृत्तानुसार कारमध्ये चार प्रवासी होते जे पर्यटक असण्याची शक्यता आहे. ही घटना मध्यरात्री 12.45 च्या वा. सुमारास घडली. पोलिसांच्या म्हणण्यानुसार, त्यांना काही लोकांनी संपर्क केला होता की त्यांच्यापैकी चार लोक बेपत्ता आहेत व त्यांचे मोबाईल फोन बंद आहेत. हो माहिती पडताळून तेच लोक आहेत का याचा शोध पोलिस घेत आहेत.