Cape News :

केपे, सावर्डे मतदारसंघात लोकांना विश्वासात घेऊनच विकासकामे केली जाणार आहेत.

आतापर्यंत अनेक विकासकामांना सुरुवात झाली आहे असे सावर्डेचे आमदार तथा गोवा पर्यटन महामंडळाचे अध्यक्ष गणेश गावकर यांनी सांगितले. सावर्डे पंचायत क्षेत्रातील धडे येथील श्री नागनाथ वेताळ देवस्थानाच्या सुशोभीकरण कामाच्या शुभारंभाच्या कार्यक्रमावेळी ते बोलत होते.

यावेळी जिल्हा पंचायत सद्स सुवर्णा तेंडुलकर, सरपंच चिन्मयी नाईक, पंच सद्स शशिकांत नाईक व इतर मान्यवर उपस्थित होते.

श्री वेताळ देवस्थानाच्या सुशोभीकरण कामासाठी तब्बल साडेचार कोटी खर्च करण्यात येणार असून यात देवस्थानात येणाऱ्या भविकासाठी आवश्यक त्या सुविधा उपलब्ध करून देण्यात येणार आहेत यात मुख्य म्हणजे प्रसाधन गृह,हात पाय धुण्यासाठी वेगळी व्यवस्था तसेच मंदिरासमोर भव्य प्रवेशद्वाराचा समावेश असल्याचे गावकर यांनी सांगितले.

दक्षिण गोव्यात सरकारी खर्चाद्वारे अशी सुविधा असलेले हे पहिलेच देवस्थान असणार असल्याचे त्यांनी सांगितले. मुख्यमंत्री प्रमोद सावंत व पर्यटन मंत्री रोहन खंवटे यांच्या सहकार्यामुळे हे काम होत असल्याचे त्यांनी सांगितले.

आमदार गणेश गावकर यांनी या दोन वर्षात सावर्डे पंचायत क्षेत्रात अनेक विकासकामे केली असून यात आपल्या प्रभागात सुद्धा भरीव कामे पूर्ण झाली असल्याचे पंच सदस्य शशिकांत नाईक यांनी सांगितले.

आज देवस्थानाच्या सुशोभीकरण कामाबरोबर एक किमी जलवाहिनी घालण्याच्या कामाचा शुभारंभ करण्यात आल्याने आता खऱ्या अर्थाने आपल्या प्रभागात ‘हर घर नल से जल’ या योजनेचा लाभ होणार असल्याचे नाईकयांनी सांगितले.