Sinquerim hill construction ban

कळंगुट: कांदोळी पंचायत क्षेत्रातील सिकेरी येथील टेकडीवर यापुढे कुठल्याही प्रकारच्या बांधकामास परवानगी न देण्याचा ठराव कांदोळी पंचायत मंडळाकडून घेण्यात आला असून त्याच्या प्रती मुख्यमंत्री कार्यालय तसेच पीडीए प्राधिकरणाला पाठविण्यात आल्याची माहिती सरपंच ब्लेझ फर्नांडिस यांनी दिली.

दरम्यान, येथील अतिसंवेदनशील तसेच जैवसंवर्धनात्मक असलेल्या टेकडीवर सरकारकडून कॅक्रीटचे जंगल उभारण्याऐवजी वनस्पतीजन्य महाबगीचा उभारण्यात यावा, अशी मागणी ठरावात करण्यात आली आहे.

दरम्यान, ताज हॉटेल्स ग्रुपला येथील लाखो चोरीस मीटर जमीन भाडेपट्टी तत्त्वावर देण्याचा निर्णय सरकारकडून घेण्यात आला होता, तो निर्णय सरकारने तत्काळ मागे घ्यावा अन्यथा सेव सिकेरी नावाने जन-आंदोलन उभारण्याचे संकेत कळंगुट फोरम कडून सरकारला याआधीच देण्यात आला आहे.

या पार्श्वभूमीवर गुरुवारी सकाळी कांदोळी पंचायतीची सभा पार पडली व या सभेत सरपंच ब्लेझ फर्नांडिस व इतर पंचायत सदस्यांनी सिकेरी टेकडीवर कुठल्याही प्रकारच्या बांधकामास परवानगी न देण्याचा एकमुखी ठराव ‌मंजूर करून घेतला.

टेकडीवर सलमानचाही बंगला...?

सिकेरी टेकडीवरचा विषय आजकालचा नसून साल १९८० पासूनचा आहे. सरकारने टेकडीवरील जमीन हॉटेल बांधकामाच्या उभारणीसाठी भाडेतत्त्वावर देण्याचा निर्णय याआधीच घेतला होता व स्थानिक पंचायत मंडळाने साठ दिवसांच्या आत या प्रकल्पास मान्यता देण्याचे सूचित केले होते. अभिनेता सलमान खान यांचाही बंगला येथील टेकडीवर येत असल्याचे ऐकू येत आहे जर सलमानला परवानगी मिळत असेल तर ताज हॉटेल ग्रुपला का नाही, असा प्रश्‍न सरकारकडून विचारला जाऊ शकतो. सिकेरी टेकडीवरून घमासान सुरू झालेले असताना स्थानिक आमदार कुठे आहेत असा प्रश्‍न कळंगुटचे माजी आमदार आग्नेलो फर्नांडिस यांनी उपस्थित केला आहे.