Canacona: काणकोणात 50 हेक्टर वायंगण शेतजमिनीपैकी 46 हेक्टर जमिनीत यांत्रिक पद्धतीने लागवड करण्यात येते अशी माहिती विभागीय कृषी अधिकारी कीर्तीराज नाईक गावकर यांनी दिली. काणकोणात खरीप हंगामात 250 हेक्टर जमिनीत भात शेतीची लागवड करण्यात येते.

प्रत्येक चौरस मीटरमागे पन्नास टक्के अनुदान तत्त्वावर दीड रुपये शेतकऱ्यांना कृषी खात्याकडे भरणा करावे लागतात. लागवडीसाठी तरवाही उपलब्ध करून देण्यात येत आहे.

पैंगीण येथील महेंद्र भंडारी व लोलये येथील जितेंद्र फडते या दोन युवकांनी कृषी खात्याच्या आर्थिक सहकार्याने ट्रान्सप्लांटिंग यंत्र खरेदी केले आहे. पहिल्या वर्षी फक्त 50हजार चौरस मीटर क्षेत्रात यांत्रिक पद्धतीने लागवड करण्याचे काम त्यांना मिळाले.

मात्र, त्यामध्ये सातत्याने वाढ होऊन यंदा तीन लाख चौरस मीटर झाली आहे. येणाऱ्या वर्षात त्यामध्ये वाढ होण्याची अपेक्षा असल्याचे महेंद्र भंडारी व जितेंद्र फडते यांनी सांगितले.

काणकोणात वायंगण शेतीच्या पेरणीला यंदा उशिरा सुरुवात झाली आहे. डिसेंबर महिन्यात वायंगण शेतीची पेरणी पूर्ण करण्याकडे शेतकऱ्यांचा कल असतो. कारण, पीक तयार होताना ऐन काळात पाण्याची टंचाई होऊ नये यासाठी पेरणी लवकर आटोपली जाते.

तरवा तयार होण्यास पंधरा ते एकवीस दिवसांचा कालावधी लागतो. काही शेतकऱ्यांचा कल मनुष्यबळाचा आधार घेऊन लागवड करण्याकडे आहे.

लोटली येथील डॉन बॉस्को चॅरिटेबल ट्रस्टचे फादर जॉन काणकोणात येऊन यांत्रिक पद्धतीने लागवड करत होते. त्यांच्याकडून प्रेरणा घेऊन व त्यांच्या सहकार्याने व विभागीय कृषी अधिकारी कीर्तीराज नाईक गावकर यांच्या मार्गदर्शनाखाली यंत्र घेऊन स्वत:चा व्यवसाय सुरू केला आहे.

यांत्रिकरणामुळे उत्पादन खर्च कमी होत असल्याने दरवर्षी पडिक जमीन लागवडीखाली येत असल्याचे पाहून समाधान होत आहे. - महेंद्र भंडारी व जितेंद्र फडते