आगोंद: दुमाणे-काणकोण येथे एका महिला दुचाकीचालकाचा एका दुचाकीचालकाने विनयभंग केला. मात्र, काणकोण पोलिसांनी तक्रार नोंद करून घेण्यास टाळाटाळ करून फक्त मोबाईल क्रमांक लिहून घरी पाठविले, असे पीडित महिलेने पत्रकारांना सांगितले.

ही महिला काणकोण पोलिस ठाण्याजवळच गेल्या पाच वर्षांपासून राहते. शुक्रवारी सायंकाळी आगोंद येथे एका मैत्रिणीला भेटून घरी परतताना ७.४५ च्या सुमारास दुमाणे येथे आलेल्या एका दुचाकीचालकाने वाहनावरून ‘पाळोळे समुद्रकिनाऱ्यावर कसे जायचे?’ असे विचारत अचानक माझ्या छातीवर हात टाकला.

पण मी त्याचा जोरदार प्रतिकार करून तेथून पसार झाले. अशी स्थिती आणखी कोणावर येऊ नये, यासाठी काणकोण पोलिस ठाण्यात तक्रार नोंदवण्यास गेले असता, तेथे उपस्थित असलेल्या महिला पोलिस अधिकाऱ्याने माझी तक्रार न नोंदवताच फक्त माझा मोबाईल क्रमांक लिहून घेतला, तसेच पोलिस गस्त वाढवू, असे सांगून मला माघारी पाठविले. या प्रकरणात आम्हाला न्याय मिळावा, अशी मागणी पीडित महिलेच्या पतीने पत्रकारांशी बोलताना केली.

दुमाणे-काणकोण मार्गावर अंधाराचे साम्राज्य

ही घटना घडली, त्याठिकाणी ५०० मीटर लांब रस्त्यावर अंधाराचे साम्राज्य आहे. त्याठिकाणी पथदिवे लावावेत, तसेच महत्त्वाच्या ठिकाणी सीसीटीव्ही कॅमेरा बसवावेत, अशी मागणी पीडित महिलेने केली आहे.

मी देशभरात अनेक ठिकाणी राहिले असून काणकोण हे ठिकाण मला सर्वांत सुरक्षित वाटते. मात्र, या प्रकारामुळे भीती निर्माण झाली आहे, असे पीडितेने सांगितले.