Canacona: मोठा गाजावाजा करून काणकोणात सुरू केलेल्या चावडी व पैंगीण येथील स्वयंपूर्ण चतुर्थी बाजाराचे गणित फसले आहे. या बाजारात विक्रीसाठी येणाऱ्या वस्तूंच्‍या दरावर नियंत्रण नसल्याने ग्राहकांनी या बाजाराकडे पाठ फिरवली आहे. माटोळीचे सामान तर दामदुप्पट दराने विकण्यात येत आहे.

या बाजारात कांगणी, खिळखिळे, माडतचे कात्रे यासारखे माटोळीचे सामान 30 रुपये चुडी दराने विकले जात आहे. त्यात लहान चुडीमध्ये सामानही कमी असते. स्वंयपूर्ण बाजारात सामान विक्रीस बसणाऱ्या स्वंयसहाय्य गटांना व अन्य विक्रेत्याना सोपो करातून सूट देण्यात आली आहे. त्यामुळे त्यांनी मालाची विक्री वाजवी दरात करून या महागाईच्या काळात नागरिकांना दिलासा द्यावा हा त्यामागील सरकारचा हेतू होता. मात्र मुख्य हेतूलाच बगल देण्यात आली आहे.

काणकोणात आज शनिवारी आठवड्याचा बाजार होता. या बाजारात गणेश चतुर्थीसाठी लागणारी फळफळावळ व भाजी खरेदी करण्यासाठी लोकांनी गर्दी केली होती. २० ऑगस्टपासून या बाजाराला सुरूवात झाली, मात्र चतुर्थीचा बाजार यंदा ३१ तारखेला चतुर्थी असल्याने तीन दिवस अगोदर भरणार आहे. मात्र दरावर नियंत्रण गरजेचे आहे.