राज्यात गेल्या तीन दिवसांपासून नायकावाडा कळंगुट येथील हत्या प्रकरण चांगलंच गाजत आहे. यातच आता, नायकावाडा येथील दिओदिता फर्नांडिस यांचा गळा आवळून खून करणाऱ्या दोघांच्या मुसक्या आवळण्यात पोलिसांना यश आले आहे. हे दोघेही शेजारील महाराष्ट्रातील आहेत. आकिब उर्फ शौकत खल्पे (रत्नागिरी, महाराष्ट्र) आणि निखिल चंद्रकांत राजे (पुणे, महाराष्ट्र) अशी आरोपींची नावे आहेत. गेल्या तीन दिवसांपासून कळंगुट पोलिस या दोघांच्या मागावर होते. अखेर या दोघांना अटक करण्यात पोलिसांना यश आले.

दरम्यान, नायकावाडा कळंगुट येथे मृत सापडलेल्या दिओदिता फर्नांडिस (64, करासवाडा म्हापसा) यांचा गळा आवळूनच खून झाल्याचे पोस्टमार्टममधून समोर आले होते. तर दुसरीकडे, पोलिसांनी या प्रकरणातील संशयितांची ओळख पटवली होती. संशयित शेजारील राज्यात (महाराष्ट्र) पळून गेल्यामुळे पोलीस पथके त्यांचा माग काढण्यासाठी त्या ठिकाणी पाठवण्यात आली होती.

शुक्रवारी (23 ऑगस्ट रोजी) नायकावाडा येथील बेन्सन ई नामक इमारतीमधील तिसऱ्या मजल्यावरील प्लॅटमध्ये दिओदिता फर्नांडिस यांचा मृतदेह संशयास्पद स्थितीत आढळला होता. कळंगुट पोलिसांनी तात्काळ घटनास्थळी पोहोचून पंचनामा करुन शुक्रवारीच खून आणि लुटमारीच्या गुन्ह्याची नोंद केली होती. दिओदिता यांच्या भावजींनी पोलिसांत तक्रार दिली होती. शनिवारी सकाळी पोस्टमार्टम रिपोर्टमधून स्पष्ट झाले की, दोरीच्या सहाय्याने गळा आवळून दिओदिता यांचा खून करण्यात आला आहे. तर दुसरीकडे, दिओदिता यांचा मृतदेह पाहिल्यानंतर आणि प्लॅटला बाहेरुन कुलूप लावण्यात आल्याने हा खूनाचाच प्रकार असल्याचे दिओदिता यांच्या नातेवाईकांनी दावा केला होता.