Calangute Drug Case: गोव्यात वाढत्या शहरीकरणाबरोबरच गुन्हेगारीच्या घटनाही दिवसेंदिवस वाढू लागल्या आहेत. डॉल्फिन सर्कल येथे कळंगुट पोलिसांनी अंमली पदार्थांवर छापा टाकल्याचे वृत्त समोर आले असून यात एका संशयितास अटक करण्यात आली आहे.

याबाबत अधिक माहिती अशी की, नाईकवाडो कळंगुट येथील डॉल्फिन सर्कलजवळ एका ग्राहकाला अंमली पदार्थांची विक्री करण्यासाठी एक संशयित दुचाकी घेवून येणार असल्याची माहिती कळंगुट पोलिसांना विश्वसनीय सुत्रांकडून मिळाली होती.

या माहितीच्या आधारे पोलिसांनी सापळा रचला. संशयित सर्कलजवळ आला असता पोलिसांनी छापा टाकत संशयिताची व त्याच्या दुचाकीची तपासणी केली. यावेळी त्याच्याकडे 2.610 किलोग्रॅम गांजा आढळून आला.

या कारवाईत कळंगुट पोलिसांनी संशयित रामप्रिया कुमार चौधरी, वय 22 वर्षे, डिचोली, मूळ बिहार याला अटक केली. तसेच त्याच्याकडील 2 लाख 60 हजारांचा गांजा व दुचाकी जप्त केली.

त्याच्यावर एनडीपीएस ॲक्ट अंतर्गत गुन्हा दाखल करण्यात आला आहे. याप्रकरणी कळंगुट  पोलिस अधिक तपास करत आहेत.