म्हापसा: कळंगुट परिसरातील खुल्या गटारांमध्ये व नाल्यांमध्ये प्रक्रिया न केलेले सांडपाणी सोडणाऱ्या हॉटेल्स व गेस्ट हाऊसेसविरोधात कळंगुट ग्रामपंचायतीने कारवाई सुरू केली आहे. स्थानिकांच्या तक्रारींची दखल घेत ६६ व्यावसायिक आस्थापनांना कारणे दाखवा नोटिसा बजावल्याची माहिती सरपंच जोसेफ सिक्वेरा यांनी ग्रामसभेत दिली.

आरोग्य व पर्यावरणाचा प्रश्न निर्माण करणाऱ्या आस्थापनांवर लक्ष ठेवण्यासाठी पंचायतीने अचानक तपासणी सुरू केली असून, जुन्या व्यावसायिक मालमत्तांमधील सांडपाणी प्रक्रिया प्रकल्प व शोषखड्ड्यांची तपासणी केली जात आहे.

दरम्यान, ग्रामसभेत बागा येथील प्रस्तावित बहुमजली पार्किंग प्रकल्पावर चर्चा झाली. स्थानिक रहिवासी मॅन्युएल कार्दोज यांनी पार्किंगच्या समस्येमुळे वाहतूक कोंडी वाढत असल्याचे सांगितले. यावर सरपंचांनी वाढत्या गरजेमुळे हा प्रकल्प आवश्यक असून गोवा राज्य पायाभूत सुविधा विकास महामंडळ त्याचे नियोजन करत असल्याचे स्पष्ट केले.

लोकहितार्थ प्रकल्प : सरपंचांचे म्हणणे

‘बोआ वियागेम’ येथील नियोजित क्रीडा संकुलाला कळंगुट कोमुनिदाद व्यवस्थापन समितीने आक्षेप घेतला आहे. कोमुनिदाद जमिनीवर पूर्वपरवानगीशिवाय प्रकल्पाची घोषणा केल्याचा आरोप करत समिती सदस्यांनी स्पष्ट केले की, पंचायतीने आधी रितसर अर्ज सादर करावा, जो मंजुरीसाठी कोमुनिदादच्या जनरल बॉडीसमोर ठेवला जाईल. तर सरपंचांनी हा लोकहितार्थ प्रकल्प असून यासाठी आधीच जाहीर नोटीस काढण्यात आली असल्याचे सांगितले.