MLA Michael Lobo: कळंगुट येथील शिवाजी महाराजांच्या पुतळ्यावरून झालेल्या वादानंतर येथील आमदार मायकल लोबो यांनी या घटनेबाबत आपले मत व्यक्त केले आहे.

शिवाजी महाराजांच्या पुतळ्याला कुणाचाच विरोध नाही, पण पुतळा बसवताना संबंधित सर्व घटकांना विश्वासात घ्यायला हवे होते, इतकी घाई करण्याचे काही कारण नव्हते, असे मत लोबो यांनी व्यक्त केले आहे.

आमदार लोबो म्हणाले की, त्या दिवशी पुतळा हटवत असल्याबाबतची चुकीची माहिती पसरवली गेली. त्यामुळे हे प्रकरण अगदी राष्ट्रीय स्तरापर्यंत चर्चिले गेले. काही गोंधळ करायची गरज नव्हती. जागेला कुणाचीही हरकत नाही.

लोबो म्हणाले, आम्ही रोनाल्डोचा पुतळा उभारला, पण तो रस्त्यात नाही. तो दोन रस्त्यातील ओपन स्पेसमध्ये आहे. त्यालाही कुणाची हरकत नव्हती. येथेही कुणाची हरकत नव्हती. पण या मुद्याचा मोठा इश्यु केला गेला.

गोव्यात सर्व गोवेकर एकत्र राहतात. गोवा शांत राज्य आहे. येथील शांतता आणि एकोपा कायम राहिला पाहिजे.

लोबो म्हणाले, पुतळा उभारताना सर्वांना विश्वासात घेतले गेले पाहिजे होते. पंचायत आहे, आमदार, सार्वजनिक बांधकाम विभाग, वाहतूक विभाग यापैकी कुणालाही विश्वासात घेतले गेले नाही. संबंधित समितीने विश्वासात घ्यायला हवे होते.

पुतळ्याला कुणाचाही विरोध नाही. आता तिथे दोन सर्कल झाले आहेत. आता, सार्वजनिक बांधकाम आणि वाहतूक विभागाला तिथे काम करावे लागेल.