पणजी: ‘‘काँग्रेसला कळंगुटमधील राखण यात्रेसाठी स्‍थानिक काँग्रेस नेते, कार्यकर्ते मिळाले नाहीत. त्‍यामुळे प्रत्‍येकी दीड हजार रुपये देऊन केपेतील लोकांना कळंगुटमध्‍ये आणावे लागले’’, असा दावा कळंगुटचे आमदार मायकल लोबो यांनी सोमवारी पत्रकारांशी बोलताना केला.

येत्‍या विधानसभा निवडणुकीच्‍या पार्श्वभूमीवर, प्रदेश काँग्रेसने राज्‍यभर गोवा राखण यात्रा सुरू केलेली आहे. परंतु, या यात्रेत इतर राज्‍यांतील काँग्रेस कार्यकर्त्यांचा भरणा अधिक आणि स्‍थानिकांचा सहभाग कमी असल्‍याने यात्रेची भाजप नेत्‍यांकडून खिल्ली उडवली जात आहे. ही यात्रा रविवारी कळंगुटमध्‍ये झाली.

यासंदर्भात पत्रकारांनी सोमवारी आमदार मायकल लोबो यांच्‍याशी संवाद साधला असता, ‘‘कळंगुटमधील यात्रेला काँग्रेसला स्‍थानिक नेते मिळाले नाहीत. त्‍यामुळे प्रत्‍येकी दीड हजार रुपये देऊन केपेतून नागरिकांना आणावे लागले. यात्रेत केपेतील चार बसेसमधून आलेले सुमारे १४० जण सहभागी झाले होते’’, असे ते म्‍हणाले.

कळंगुटमधील जनतेचा माझ्‍यावर विश्‍‍वास!

‘‘निवडणुकीच्‍या तोंडावर कळंगुटमधील जे नेते काँग्रेसमध्‍ये गेले आहेत, ते मुळचे भाजपचे आहेत. त्‍यांना काम नको, सत्ता हवी आहे. त्‍यामुळे कळंगुटमधील विकासकामांनाही त्‍यांच्‍याकडून विरोध होत आहे. आपल्‍याला जनतेची कामे झालेली हवी आहेत.

आमदार या नात्‍याने आपण त्‍यासाठी प्रयत्‍नरत असतो. याची कळंगुटमधील जनतेला जाणीव आहे. त्‍यामुळे तेथे आपल्‍याविरोधात कितीहीजण एकत्र आले, तरी आपल्‍याला भीती बाळगण्‍याची गरज नाही. कळंगुटमधील जनतेचा माझ्‍यावर पूर्ण विश्‍‍वास आहे’’, असे लोबो यांनी नमूद केले.