पणजी: बांबोळी येथील तीन अल्पवयीन मुलींना वाढदिवस साजरा करण्यासाठी बोलावून त्यातील दोघींवर लैंगिक अत्याचार केल्याचा धक्कादायक प्रकार उघडकीस आला आहे. याप्रकरणी आगशी पोलिसांनी पर्वरीतील संशयित अल्ताफ मेहबूब मुजावर (१९) व ओम विनय नाईक (२१) या दोघांना अटक केली आहे. त्यांच्याविरुद्ध बलात्काराचा गुन्हा दाखल केला आहे. न्यायालयाने ३ दिवसांची कोठडी दिली आहे.

बांबोळी कॉम्प्लेक्स येथे राहत असलेल्या दोन कुटुंबातील ११ ते १५ वयोगटातील तीन अल्पवयीन मुली ८ जून रोजी गायब झाल्या होत्या. रात्री उशिरा न परतल्याने त्यांच्या कुटुंबीयांनी दोन वेगवेगळ्या तक्रारी दाखल केल्या होत्या. आगशी पोलिसांनी कळंगुट येथील एका हॉटेलमधून तिन्ही अल्पवयीन पीडित मुलींची सुटका केली.

तसेच त्यांच्यासोबत असलेल्या दोन तरुणांनाही ताब्यात घेऊन पोलिस स्थानकात आणले. हॉटेलमध्ये चौकशी करता असे दिसून आले की दोन्ही संशयितांनी हॉटेलमध्‍ये दोन वेगवेगळ्या खोल्‍या आरक्षित केल्‍या होत्‍या. संशयितांपैकी एकाचा वाढदिवस होता व या पीडित मुलींना त्यासाठी बोलावण्यात आले होते.

या तिन्ही मुलींना त्यांचे जबाब नोंदवण्यासाठी बांबोळी येथील पीडित सहाय्यता केंद्रात पाठवण्यात आले. त्‍यांच्‍या जबाबातून असे दिसून आले की, हॉटेल रूममध्ये दोन पीडित मुलींवर लैंगिक अत्याचार झाले. त्यानुसार पोलिसांनी गोवा बाल कायदा २००५ च्या कलम कलम ८ (२), बीएनएसच्या कलम १३७ (२), ६४(१), ७४, ७५(१) आणि पोक्सो कायद्याच्या कलम ४, ८, १२ अंतर्गत गुन्हा दाखल केला.

पुढील तपास निरीक्षक अनंत गावकर यांच्या देखरेखीखाली महिला पोलिस उपनिरीक्षक दीपिका परवार आणि उपनिरीक्षक ऋषिकेश रायकर करत आहेत.