Goa Calangute Beach: नाताळ सणाच्या पार्श्वभूमीवर बार्देशातील कळंगुट तसेच बागा येथील समुद्र किनारी लाखोंच्या संख्येने देशी- विदेशी पर्यटक उतरलेले असून त्यांना उपद्रव करणाऱ्या भिकाऱ्यांना कळंगुट पोलिसांनी ताब्यात घेतले. न्यायालयात हजर करून त्यांना समज देऊन सुटका केली, अशी माहिती निरीक्षक दत्तगुरू सावंत यांनी दिली.

कर्नाटक, तामिळनाडू आणि तेलंगणातील भिकारी मोठ्या प्रमाणात कळंगुट -बागा परिसरात उपद्रव करीत आहेत. येथील किनारी भाग तसेच मार्केट परिसरात भीक मागण्यांच्या हेतूने फिरतात. त्यामुळे पर्यटकांना मोठ्या प्रमाणात उपद्रव होत आहे.

यासंबंधात स्थानिक शॅकवाले तसेच दुकानदारांनी पोलिसात कळवल्यानंतर पोलिस निरीक्षक दत्तगुरु सावंत यांनी महिला उपनिरीक्षक तसेच अन्य शिपायांच्या मदतीने कारवाई केली. यावेळी भीक मागणारे सहा पुरुष, सहा महिला आणि अल्पवयीन मुलांना ताब्यात घेऊन त्यांना न्यायालयात हजर केले. न्यायालयाकडून त्यांना योग्य समज आणि इशारा देऊन सोडून देण्यात आले.

कळंगुट पाठोपाठ हणजुण -वागातोरातही मोठ्या प्रमाणात भीक मागणाऱ्या लोकांचे गट फिरत असल्याचे आढळल्याने हणजुण पोलिसांकडून तात्काळ त्यांना हुसकावून लावण्यासाठी कालपासूनच विशेष मोहीम हाती घेण्यात आल्याची माहिती पोलिस निरीक्षक प्रशाल देसाई यांनी दिली.