जून महिन्यात नियोजित सुप्रिम ऑडिट इन्स्टिट्यूशन्स (एसएआय२०)च्या शिखर परिषदेच्या तयारीचा आढावा घेण्यासाठी भारताचे नियंत्रण आणि महालेखापरिक्षक (कॅग) कार्यालयाचे सहा सदस्यीय शिष्टमंडळ संचालक (कार्मिक) विशाल देसाई यांच्या नेतृत्वाखाली गोव्याच्या दौऱ्यावर आले आहे.

यावर्षी भारत देशास जी-20चे अध्यक्षपद लाभले असल्याने एसएआय20 या संस्थेचे अध्यक्षपद भारताचे नियंत्रण आणि महालेखापरिक्षक हे भूषवित आहेत. भारतासह 20 सदस्य देशांमध्ये सार्वजनिक क्षेत्रात सुशासन आणि सार्वजनिक जबाबदारी याबाबींचा प्रसार करणे व त्यांना चालना देण्यासाठी भारतास संधी मिळाली आहे.

सुप्रीम ऑडिट इन्स्टिट्यूशन (किंवा एसएआय 20 किंवा साई20) हा जी-20 सदस्य देशांमध्ये सुशासन, प्रादर्शकता व जबाबदारपणा या बाबींना प्रोत्साहन देण्यासाठी लेखापरिक्षण करणाऱ्या संस्थांचा समूह आहे. जी-20 परिषदेचा एक भाग म्हणून गोव्यात 12 ते 14 जून दरम्यान ‘एसएआय२०’च्या दोन बैठकांचे नियोजन करण्यात येणार आहे.

सर्व संबंधित घटकांसमवेत चर्चा, संवाद घडवून प्रशासकीय कारभारामध्ये पारदर्शकता तसेच जबाबदारी वाढवण्याबाबत धोरण निर्मिती करण्याचे प्रयत्न एसएआय २०च्या संपर्क गटाने राबवले आहेत. या धोरण शिफारशींचा वापर संबंधित देशाचे धोरण हे शिखर संस्थेच्या उद्दिष्टांशी सुसंगत करणे आणि जागतिक अर्थव्यवस्थेवर प्रभावी ठरतील यासाठी केला जातो.

हॉटेल, विमानतळाला देणार भेट

गोवा सचिवालयामध्ये या शिष्टमंडळासमवेतची बैठक गोव्याचे शिष्टाचार सचिव आणि जी-२० परिषदेसाठीचे नोडल अधिकारी संजीत रॉड्रिग्ज यांच्या अध्यक्षतेखाली झाली. हे शिष्टमंडळ शनिवारपर्यंत गोवा दौऱ्यावर असून एसएआय२० शिखर परिषदेच्या तयारीचा आढावा घेण्यासाठी विविध हॉटेल, विमानतळ आणि परिषद ठिकाणांना भेट देणार असल्याचे त्यांनी स्पष्ट केले.

भारताचे नियंत्रक आणि महालेखा परीक्षक तसेच एसएआय २०चे अध्यक्ष गिरीश चंद्र मुर्मू यांनी आगामी एसएआय बैठकांमध्ये सागरी जल अर्थव्यवस्था (ब्लू इकॉनॉमी) आणि जबाबदार कृत्रिम बुद्धिमत्ता या विषयांचाही समावेश करण्यास सूचित केले आहे.