Valpoi News : सत्तरीत आंघोळीसाठी बंधारे हाऊसफुल!

वाळपई : गेल्या काही दिवसांपासून वाढत्या तापमानामुळे आबालवृद्धांचा नदी, नाल्यातील पाण्‍याच्या ठिकाणी आंघोळीसाठी गर्दी होत आहे. सत्तरी तालुक्यात म्हादई, वेळूस, रगाडा, वाळवंटी नदी पात्रात बांधलेल्या बंधाऱ्यामुळे पाणी मोठ्या प्रमाणात उपलब्ध आहे. त्या ठिकाणी सुटीच्या दिवशी मोठ्या प्रमाणात गर्दी होती आहे.

जलसिंचन खात्यातर्फे उभारण्यात आलेल्या बंधाऱ्यातील पाण्यात नागरिक आंघोळ करताना दिसत आहेत. खास करून रविवार व सुट्टीच्या दिवशी प्रचंड प्रमाणात नागरिकांचा मोर्चा नदीच्या पाण्यावर वळताना दिसतात. शुक्रवारी ‘गुड फ्रायडे’ची सुट्टी असल्याने अनेकांनी उस्ते येथील बंधाऱ्यावर मनसोक्त आंघोळीचा आनंद लुटला.

सत्तरी तालुक्यात तसेच अनेक पर्यटक ठिकाणे आहे. मात्र उस्ते या ठिकाणी उभारण्यात आलेल्या बंधारा आंघोळीसाठी अत्यंत चांगला असल्यामुळे मोठ्या प्रमाणात नागरिक सदर ठिकाणी भेट देत आहेत. रविवारच्या दिवशी जवळपास दीड-दोन हजारापेक्षाही अधिक नागरिक सदर बंधाऱ्यावर आंघोळीसाठी येतात.

म्हादई नदीच्या उगम हा नानोडा, देरोडे येथून येऊन उस्ते येथे या नदीचा संगम होत आहे. नगरगाव पंचायत क्षेत्रातील उस्ते या ठिकाणी उभारण्यात आलेला बंधारा पर्यटकांसाठी व नागरिकांसाठी आकर्षणाचा केंद्रबिंदू ठरू लागला आहे

प्रदूषणविरहित पाणी

जवळपास १२० कोटी खर्चून सत्तरी तालुक्यातील म्हादई, वेळूस, रगाडा वाळवंटी अशा अनेक नद्यांवर बंधाऱ्यांचे माळ उभारण्यात आले. यामुळे मोठ्या प्रमाणात पाण्याचा साठा होऊ लागला आहे. म्हादई नदीचे पाणी हे प्रदूषणविरहित आहे. यामुळे या नद्यांवर अंघोळ करणे ही खरोखरच समाधानकारक बाब आहे.

सत्तरीत पावसाळी पर्यटन वाढत असून उन्हाळ्यातसुद्धा पर्यटकांना सुविधा पुरवणे आवश्‍यक आहे. त्यासाठी ठिकाणी नगरगाव पंचायतीने शौचालय, कपडे बदलण्यासाठी खोलीची सोय करावी. यासाठी आवश्यक शुल्क आकारल्यास पंचायतीच्या महसूलही मिळू शकतो. पर्यटनदृष्ट्या या भागाचा विकास केल्यास जनतेलाही लाभ होईल, असे ग्रामस्थांनी व्यक्त केले.