साखळी: साखळी बसस्थानकाजवळील टपाल कार्यालयासमोरील उतरणीच्या पदपथावर उभी करून ठेवलेली बस अचानक खाली उतरल्याने दोन कारगाड्यांना धडकली. सुदैवाने कोणालाही इजा झाली नाही. दुसऱ्या कारमुळे बस अडकून पडली, अन्यथा ती बसस्थानकापर्यंत गेली असती व मोठा अपघातही घडला असता.

ही घटना आज सकाळी ९.३० च्या सुमारास घडली. या उतरणीच्या पदपथावर जीए - ०४ - टी - १३९७ क्रमांकाची बस उभी करून ठेवली होती. ती अचानक खाली उतरली. सर्वप्रथम या बसने एमएच - ४३ - बीई - ५८९७ या या कारला धडक दिली. या धडकेत ही कार फरफटत बाजूला गेली. त्यानंतर बसने समोर असलेल्या दुसऱ्या कारला धडक दिली. ही कार आडवी होत बाजूला असलेल्या संरक्षण भिंतीला अडकली व बस या कारवरच स्थिरावली.

बसच्या धडकेत दुसरी कार जर बाजूला सरकली असती, तर बस थेट रस्त्यावर आली असती व बसस्थानकापर्यंत गेली असती. साखळी बसस्थानकाचा रस्ता व परिसर हा सदैव रहदारीचा असतो. त्यातच सकाळच्या वेळी या रस्त्यावर मोठ्या प्रमाणात वाहनांची ये - जा चालू असते.

पदपथावर पार्किंग नको

ही बस नियंत्रण सुटलेल्या अवस्थेत बसस्थानकापर्यंत खाली उतरली असती, तर मोठा अपघात घडला असता. सुदैवाने संभाव्य अनर्थ टळला. साखळी नगरपालिकेने पादचारी व विद्यार्थ्यांना चालण्यासाठी पदपथ बनविला आहे. त्यावर वाहने पार्किंग करायला देऊ नये, अशी स्थानिकांची मागणी आहे.