पणजी : शिरसई थिवी येथे प्रवासी बसचा भीषण अपघात झाला आहे. रस्त्याशेजारील विजेच्या खांबाला धडक बसल्याने बसचं मोठं नुकसान झालं. या अपघातात बसमधील अनेक प्रवासी जखमी झाले आहेत. अपघातानंतर अडकलेल्या बस चालकाला लोकांनी सुरक्षित बाहेर काढले.

उत्तर गोव्यातील शिरसई येथे शनिवारी दुपारी एका प्रवासी बसचा भीषण अपघात झाला आहे. चालकाचं बसवरील नियंत्रण सुटल्याने बस रस्त्याशेजारील विजेच्या खांबाला जाऊन धडकली. ही धडक इतकी जोरदार होती की बसच्या दर्शनी भागाचा चक्काचूर झाला आहे. अपघातावेळी बसमध्ये अनेक प्रवासी असल्याने ते जखमी झाले आहेत. चालकाच्या बाजूने बस खांबाला धडकल्याने गाडीचा चालक अकडून बसला होता. स्थानिकांच्या मदतीने चालकाला बसच्या बाहेर काढण्यात आलं आहे.

दरम्यान गोव्यात गुरुवारी रात्री पुन्हा एकदा वादळी वाऱ्यासह मुसळधार पावसाने थैमान घातलं. त्यातच भर म्हणजे पर्वरी परिसरात मुंबई-गोवा महामार्गावर कंटेनर पलटी झाल्याने भीषण अपघात झाला. कंटेनरने आपल्यासह इतर दोन वाहनांचंही मोठं नुकसान केलं. अपघातामुळे महामार्गावरील वाहतुकीचे मात्र तीनतेरा वाजले. चालकाचं कंटेनरवरील नियंत्रण सुटल्याने जाहिरातीसाठी लावलेल्या एका गाडीचाही चेंदामेंदा झाला आहे. यामुळे गुरुवारी रात्रीपासून सुकूर जंक्शनपासून ते पर्वरीपर्यंत वाहतुकीचा खोळंबा झाला होता.