वाळपई: भुईपाल येथे रविवारी रात्री एका अज्ञात व्यक्तीने १२ वर्षीय मुलाचे अपहरण करण्याचा प्रयत्न केला. मात्र, मुलाने प्रसंगावधान राखून दाखवलेल्या चातुर्यामुळे अपहरणाचा प्रयत्न फसला.

मिळालेल्या माहितीनुसार, रात्री सुमारे ९ वाजण्याच्या सुमारास मुलगा आपल्या घराजवळच राहात असलेल्या आतेभावाला घरी सोडून परत येत होता. यावेळी अचानक एक ओमनी कार तेथे थांबली आणि कारमधील एका व्यक्तीने त्याला जबरदस्तीने वाहनात ओढण्याचा प्रयत्न केला.

मात्र, मुलाने वेळ न दवडता त्या व्यक्तीच्या हाताचा चावा घेतला आणि जोरात ओरडू लागला. मुलाच्या आरडाओरड्यामुळे अपहरणकर्त्याने घाबरून तेथून पळ काढला. साक्षीदारांच्या म्हणण्यानुसार, गाडीत दोन व्यक्ती असल्याचे समोर आले आहे.

या घटनेनंतर मुलाच्या आई-वडिलांनी वाळपई पोलिस ठाण्यात तक्रार दाखल केली असून पोलिसांनी अपहरणाच्या प्रयत्नाचा गुन्हा नोंदविला आहे. मुलाच्या हातावर अपहरणकर्त्याच्या नखांच्या जखमा झाल्या असून त्याची वैद्यकीय तपासणी करण्यात आली आहे. ही घटना भरवस्तीत घडल्यामुळे गावकऱ्यांमध्ये भीतीचे वातावरण निर्माण झाले आहे.