पणजी: मासेमारी उद्योगात काम करणाऱ्यांसाठी स्वच्छता अनिवार्य आहे. त्‍यासाठी खाते प्रयत्नशील आहे. प्रत्येक मच्छीमाराने आपल्या बोटीवर, ट्रॉलर्सवर शौचालय बांधणे काळाची गरज बनली असून, ते आवश्‍‍यकच आहे. मात्र सध्‍या मच्‍छीमारांच्या समस्या लक्षात घेऊन त्‍यांना त्यांच्या बोटींवर शौचालये बांधण्यासाठी पाच ते सहा महिन्‍यांची मुदतवाढ देण्‍यात आली आहे, असे मत्‍स्‍योद्योगमंत्री नीळकंठ हळर्णकर यांनी सांगितले.

कुटबण जेटीवरील कॉलरा आणि डायरियाची साथ आता नियंत्रणात आलेली आहे. गेल्‍या २४ तासांत एकही नवीन रुग्ण आढळलेला नाही. यापूर्वी या प्रकरणांशी संबंधित पाच रुग्णांचे मृत्यू झाले होते.

बोटमालकांनी कामगारांसाठी हेल्थ कार्ड सक्तीचे करावे असे आदेश खात्‍यातर्फे देण्‍यात आले आहेत. तसेच आरोग्य विभागांना नियमित आरोग्य तपासणी करण्याच्या सूचनाही दिल्या असल्याचे हळर्णकर म्‍हणाले.

पूर्वीच्या बोटींना शौचालयाची सक्ती नकोच : हर्षद धोंड

मांडवी फिशरमन को-ऑपरटिव्ह मार्केटिंग सोसायटीचे अध्यक्ष हर्षद धोंड यांनी आज बुधवारी पत्रकार परिषद घेऊन जुन्या बोटींना शौचालय सक्तीचे करू नये अशी मागणी मत्‍स्‍योद्योग खात्‍याकडे केल्याचे स्पष्ट केले.

ते म्हणाले, ज्या बोटी किंवा ट्रॉलर्स २० मीटर बांधलेले आहेत, त्यात शौचालय बांधणे शक्य नाही. आता भविष्यात जेव्हा बोट बांधली जाईल, त्‍यांना शौचालय सक्तीचे करावे. तसेही २०१७ नंतर बांधलेल्या प्रत्येक बोटीत शौचालय आहेच.