पणजी: गेल्या काही दिवसांपासून गोव्यातील पर्यटन आणि भाजप सरकारवर सोशल मिडिया आणि माध्यमांतून टीका होत आहे. गोवा मंत्रिमंडळाच्या बुधवारी (०८ जानेवारी) झालेल्या बैठकीत पर्यटन क्षेत्राविषयी चर्चा करण्यात आली. 'टूलकिट'द्वारे गोव्याविषयी बाहेरील राज्यांत बदनामी केली जात आहे, असा मुद्दा मांडण्यात आला. ह्या 'टूलकिट'चे मूळ शोधले गेले पाहिजे, अशी मागणी यावेळी करण्यात आली.

देश पातळीवरील एका पत्रकाराने गोवा आणि सरकारच्या बदनामीसाठी 'टूलकिट' कार्यरत असल्याचा दावा केला होता. याबाबत पत्रकाराने एक्स या समाजमाध्यमावर याबाबत खुलासा केला होता.

मंत्रिमंडळाच्या बैठकीत गोव्याची आणि सरकारची बदनामी करणाऱ्या 'पेड एन्फ्लूएन्सर' ना कोणाचा पाठिंबा आहे, हे शोधून काढले पाहिजे, असे मत मंत्र्यांनी मांडले.

बाहेरच्यांसोबत काही आतले लोक त्यांना फूस देत आहेत का, याची चौकशी व्हावी, अशी मुख्यमंत्र्यांकडे मागणी करण्यात आली. पर्यटन आढाव्यासाठी सर्वसमावेशक बैठक घेण्याचे ठरले.

सरकारी नोकरीची पदे भरण्याची प्रक्रिया थांबणार नाही. पुढील दोन महिने ती सुरूच राहील. परंतु पात्र ठरणाऱ्यांची नेमणूक एप्रिलनंतर होईल, असे मुख्यमंत्री सावंत यांनी स्पष्ट केले. त्यामुळे कित्येक उमेदवारांना दिलासा मिळाला आहे.

वित्त खात्यातर्फे नुकतेच एक परिपत्रक काढण्यात आले होते. त्यात खर्च कपातीसंदर्भात खात्यांना सूचना होत्या. त्यासोबत नवीन पदे निर्माण करू नये, असाही उल्लेख होता. त्यामुळे नोकरभरती प्रक्रिया खोळंबणार हे स्पष्ट होते.

परंतु मुख्यमंत्र्यांनी त्या संदर्भात स्पष्टपणे खुलासा केला आहे. पर्वरी सचिवालयात आज मंत्रिमंडळ बैठक झाली. त्यानंतर पत्रकारांशी त्यांनी संवाद साधला. पोलिस खात्यात ६, खाण खात्यामध्ये १५, उपसंचालकांची २ कंत्राटी पदे भरण्यास मंत्रिमंडळाने मंजुरी दिली आहे. पशुपालन व पशुसंवर्धन महाविद्यालय प्राचार्यपदी डी. आंतोनियो यांची कंत्राटी पद्धतीने नियुक्ती करण्यात आली, अशी माहितीही मुख्यमंत्र्यांनी दिली.