फोंडा: उसगाव-साईनगर येथे बुधवारी (ता.१६) ओहळात वाहून गेलेला दर्शन संतोष नार्वेकर (११) याचा मृतदेह गुरुवारी दूधसागर नदीत तरंगताना आढळला. अग्निशामक दलाचे अधिकारी सुशील मोरजकर आपल्या जवानांसमवेत पाण्यात शोध घेत असताना त्यांना मृतदेह सापडला.

बुधवारी सायंकाळी तिस्क येथे ट्युशनसाठी गेलेला दर्शन आपल्या विद्यार्थी मित्रांसमवेत घरी आडवाटेने परतत होता. यावेळी वाटेतील ओहळ ओलांडताना अकस्मात ओहळात पाणी वाढल्याने विद्यार्थ्यांची घाबरगुंडी उडाली.

एकमेकांच्या हातात हात धरून ओहळ ओलांडताना त्याचा हात सुटून तो पाण्याच्या प्रवाहात वाहत गेला. तसेच त्याच्याबरोबर असलेले अन्य विद्यार्थीही पाण्याच्या झोतात वाहत होते. इतक्यात त्या ठिकाणी दर्शनची मोठी बहीण पोहोचली. तिने या विद्यार्थ्यांना पाण्यातून बाहेर काढले आणि दर्शनविषयी विचारणा केली तेव्हा या विद्यार्थ्यांनी तो वाहून गेल्याचे सांगितले.

त्यानंतर याची माहिती पोलिसांना व अग्निशामक दलाला देण्यात आली. नंतर अग्निशामक दल व पोलिसांनी स्थानिकांना बरोबर घेऊन संपूर्ण ओहळात रात्री दोन वाजेपर्यंत शोध घेतला.

गुरुवारी सकाळी अग्निशामक दलाचे अधिकारी सुशील मोरजकर यांनी बोटीच्या साहाय्याने दूधसागर- खांडेपार नदीत पुन्हा शोध सुरू केला असता दहा मिनिटांच्या आत त्याचा मृतदेह पाण्यात तरंगताना आढळला.

शववाहिकेची वानवा

फोंडा पोलिसांनी या घटनेचा पंचनामा केला व शवचिकित्सा करण्यासाठी मडगाव येथील हॉस्पिसियो येथे पाठवण्यात आला. अधिक तपास फोंडा पोलिस करीत आहेत. मृतदेह पाण्यातून बाहेर काढल्यानंतर शववाहिका लवकर न मिळाल्याने शेवटी फोंडा येथील राजेश वेरेकर यांच्या शववाहिकेने शवचिकित्सेसाठी मृतदेह पाठण्यात आला.