फोंडा: फोंडा पोलिस स्थानकाच्या हद्दीत सातत्याने चोरीच्या घटना होत असून रात्री देऊळवाडा - बोरीतील गोपाळकृष्ण मंदिराची फंडपेटी फोडून आतील सुमारे पाच हजार रुपयांचा ऐवज लंपास केला. विशेष म्हणजे गेल्या तीन महिन्यात या मंदिरातील ही चोरीची दुसरी घटना आहे.

महिन्याभरापूर्वीच बोरीतील एका घरात चोरट्यांनी धाडसी चोरी करण्याबरोबरच ढवळी आणि उसगावातील मंदिरातील फंडपेटी फोडली होती, आता महिन्यानंतर पुन्हा एकदा चोरट्यांनी डोके वर काढले आहे. चोरट्यांनी गुरुवारी साप्ताहिक उत्सवानंतर रात्री उशिरा मंदिराचा लोखंडी दरवाजा तोडून आत प्रवेश केला व मंदिराच्या गाभाऱ्यासमोरील फंडपेटी फोडली.

फंडपेटी फोडून पैसे घेऊन चोरटा तीन मिटर उंच असलेल्या कंपाऊंड भिंतीवरून उडी मारून पसार झाल्याचे सीसीटीव्ही फुटेजमध्ये दिसते. चोरट्याने चेहरा कपड्याने झाकला असल्याचे सीसीटीव्हीत स्पष्ट झाले आहे. तीन महिन्यापूर्वी मंदिराची फंडपेटी फोडल्यानंतर देवस्थान समितीने छुपे कॅमेरे बसवले होते.

मात्र असे असूनही चोरट्याने ही धाडसी चोरी केली आहे. सकाळी मंदिराचा दरवाजा उघडण्यासाठी आल्यावर चोरीचा हा प्रकार उघडकीस आला. त्यानंतर फोंडा पोलिसांना या चोरीबाबत कळवण्यात आले.

पोलिसांनी मंदिरात येऊन चौकशी केली असून पुढील तपास सुरू आहे. दरम्यान, फोंडा भागात चोरट्यांचा वावर असून चोरट्यांकडून मंदिरे टार्गेट करण्यात येत असल्याचे मागच्या चोऱ्यांवरून स्पष्ट होत असल्याचे स्थानिकांनी सांगितले.