डिचोली: डिचोली शहरातील बोर्डे भागात चक्क गटारात जलवाहिनी टाकण्याचा प्रकार घडला असून, या प्रकारामुळे स्थानिक संतप्त बनले आहेत. संतप्त बनलेल्या काही जागृत नागरिकांनी गटारातून जलवाहिनी टाकण्यास विरोध करीत बुधवारी (ता.७) सकाळी जलवाहिनीचे काम तूर्त बंद पाडले. गटारात घातलेली जलवाहिनी काढा, अशी मागणी स्थानिकांनी केली आहे.

बोर्डे भागात सध्या नवीन जलवाहिनी टाकण्याचे काम युद्धपातळीवर सुरू आहे. बोर्डे येथील चव्हाटा भागात रस्ता फोडून जलवाहिनी टाकण्यात येत आहे. हे काम करताना नियोजन करण्यात आलेले नाही. चव्हाटा येथील पिंपळाजवळ तर चक्क गटारात जलवाहिनी टाकून ती गटारातच जोडण्यात आली आहे.

हा प्रकार काही जागृत नागरिकांच्या निदर्शनास येताच त्यांनी सकाळी संबंधित कंत्राटदाराला जाब विचारीत जलवाहिनी टाकण्याचे काम बंद पाडले. या प्रकारानंतर सार्वजनिक बांधकाम खात्याचे अधिकारी घटनास्थळी आले. त्यावेळी स्थानिकांनी त्यांनाही जाब विचारीत गटारात घालण्यात आलेली जलवाहिनी काढून ती गटाराबाहेरून घालावी, अशी मागणी केली.

...तर रोगराईला आमंत्रण

गटारातून जलवाहिनी टाकणे म्हणजे जनतेच्या जीवाशी खेळ आहे. या जलवाहिनीतून बोर्डे भागात घाणयुक्त दूषित पाणीपुरवठा होण्याची शक्यता आहे. त्यामुळे भविष्यात जनतेला दूषित पाणी वापरावे लागणार असून, भयानक रोगराई पसरण्याचा धोका नाकारता येणार नाही, अशी भीती कृष्णा पळ यांच्यासह विजय बोर्डेकर आदी नागरिकांनी व्यक्त केली आहे.

दरम्यान, गटारात टाकण्यात आलेली जलवाहिनी काढून ती दुसऱ्या बाजूने घालण्यासाठी संबंधित खात्याने तयारी केल्याची माहिती मिळाली आहे.