पणजी : शेळ-मेळावली येथे आयआयटीविरोधात झालेल्या हिंसक आंदोलन प्रकरणी रिव्हॉल्युशनरी गोवन्सचे (आरजी) मनोज परब व रोहन कळंगुटक यांच्याविरोधातचा गुन्हा मुंबई उच्च न्यायालयाच्या गोवा खंडपीठाने रद्द केला. त्यामुळे या दोघांनाही दिलासा मिळाला आहे.

या गुन्ह्यात तेथील स्थानिकांचा समावेश करण्यात आला होता. त्यातील आणखी काहींनी हा गुन्हा रद्द करण्यासाठी खंडपीठात धाव घेतलेली आहे, त्यावरील सुनावणी प्रलंबित आहे.

हे आंदोलन सकाळपासून सुरू झाले होते तेव्हा हिंसक प्रकार घडला होता तर अर्जदार मनोज परब व रोहन कळंगुटकर हे संध्याकाळी या आंदोलनाला पाठिंबा देण्यास आले होते.

त्यांचा या हिंसक आंदोलनाशी काहीच संबंध नसताना ते त्यावेळी उपस्थित राहिले म्हणून दाखल केलेल्या गुन्ह्यात त्यांचा समावेश करण्यात आला होता.

त्यामुळे त्यांच्याविरुद्धचा गुन्हा रद्द करावा अशी बाजू आमदार तथा ज्येष्ठ वकील कार्लोस फेरेरा यांनी मांडली होती. सरकारी वकील प्रवीण फळदेसाई यांनी त्याला विरोध केला. मुख्य न्यायमूर्ती आलोक आराधे आणि न्या. महेश सोनक यांनी दोन्ही बाजू ऐकून घेतल्यानंतर गुन्हा रद्द करण्याचा आदेश दिला.