पणजी: गोवा येथील मुंबई उच्च न्यायालयाच्या गोवा खंडपीठाने विद्यमान व माजी खासदार आणि आमदारांविरोधातील गुन्हेगारी प्रकरणांचा तपशील असलेले दोन अहवाल जाहीर केले आहेत.

जून आणि जुलै २०२५ महिन्यांतील अहवालानुसार उत्तर व दक्षिण गोव्याच्या जिल्हा न्यायालयांमध्ये एकूण २२ प्रकरणे तर उच्च न्यायालयात दोन प्रकरणे प्रलंबित आहेत. जुलै २०२५ च्या अहवालानुसार उच्च न्यायालयाच्या गोवा खंडपीठात दिगंबर कामत व चर्चिल अलेमांव विरोधातील प्रकरणे आणून दोन्ही याचिका ‘फॉर ऑर्डर्स’ टप्प्यात आहे.

जून २०२५ च्या अहवालानुसार उत्तर गोव्यातील जिल्हा न्यायालयांमध्ये १४ प्रकरणे प्रलंबित असून, माविन गुदिन्हो व आतानासियो मोन्सेरात यांच्याविरोधातील प्रकरणे ‘ट्रायल’ टप्प्यात आहेत. दिगंबर कामत व चर्चिल अलेमांवविरोधातील एक प्रकरण ‘रिपोर्ट’ टप्प्यात असून दुसरे एक प्रकरण ‘आर्ग्युमेंट्स’ टप्प्यात आहे.

दयानंद नार्वेकर यांची प्रकरणे ‘स्टेप्स’ व ‘आर्ग्युमेंट्स’ टप्प्यात आहेत. मायकल लोबो यांची प्रकरणे ‘अॅपिअरन्स’ टप्प्यात, तर केदार नाईक व वीरेश बोरकर यांची प्रकरणे ‘आर्ग्युमेंट्स’ टप्प्यात आहेत. प्रकाश वेळीप यांच्या प्रकरणांचा समावेश ‘ट्रायल’, ‘ॲपिअरन्स’ व ‘रिप्लाय’ या टप्प्यांमध्ये आहे.

दक्षिण गोव्यातील जिल्हा न्यायालयांत ८ प्रकरणे प्रलंबित असून, फ्रान्सिस्को झेविअर पाशेखो यांच्याविरोधातील काही प्रकरणे ‘ट्रायल’ व एक प्रकरण ‘ॲपिअरन्स’ टप्प्यात आहे. विजय सरदेसाई यांचे एक प्रकरण ‘आर्ग्युमेंट’ टप्प्यात आहे, तर राजेश फळदेसाई व संकल्प आमोणकर यांची प्रकरणे ‘अॅपिअरन्स’ टप्प्यात आहेत. कॅ. वेन्झी व्हिएगस यांचे एक प्रकरणही ‘आर्ग्युमेंट’ टप्प्यात आहे.