साकोर्डा: बोळकर्णे साकोर्डा गावात एका 22 वर्षीय परप्रांतीय युवकाचा गळफास घेतलेल्या स्थितीत मृतदेह आढळून आल्याने परिसरात एकच खळबळ उडाली आहे. या घटनेमुळे स्थानिकांमध्ये भीतीचे वातावरण पसरले आहे.

मिळालेल्या माहितीनुसार, मयत युवक मूळचा उत्तर भारतातील असून काही काळापासून साकोर्डा परिसरात वास्तव्यास होता. मंगळवारी (22 जून) सकाळी बोळकर्णे येथील एका झाडाला गळफास घेतलेल्या अवस्थेत त्याचा मृतदेह आढळून आला. याची माहिती मिळताच कुळे पोलिस तात्काळ घटनास्थळी पोहोचले. त्यांनी पंचनामा करुन मृतदेह पोस्टमॉर्टमसाठी पाठवून दिला.

दरम्यान, सध्या या घटनेमागचे नेमके कारण अस्पष्ट असून घातपात की आत्महत्या याचा खुलासा पोस्टमॉर्टम अहवालानंतरच होईल. पोलिसांनी (Police) मृताच्या ओळखीची अधिकृत नोंद घेण्यास सुरुवात केली असून त्याच्या कुटुंबीयांशी संपर्क करण्याचे प्रयत्न सुरु आहेत. या प्रकरणी अधिक तपास सहाय्यक पोलिस निरीक्षकांच्या नेतृत्वाखाली सुरु आहे.

काही दिवसांपूर्वी, हडफडे-बार्देश येथून अशीच घटना समोर आली होती. येथील एका भाड्याच्या खोलीत राहणाऱ्या पतबित्र दास (वय 26, मूळ रहिवासी पश्‍चिम बंगाल) नावाच्या मुलाने राहत्या भाड्याच्या खोलीत गळफास लावून आत्महत्या केली होती. पतबित्र दास याचा मृतदेह सिलिंग रॉडला साडीने लटकलेल्या अवस्थेत आढळून आला होता.