BJP Demand Recounting In South Goa

सगळ्या गोव्याचे लक्ष लागून राहिलेल्या दक्षिण गोव्यात भाजपसाठी धक्कादायक निकाल समोर येत असून, काँग्रेस उमेदवार विरियातो विजयाच्या उबरठ्यावर पोहोचले आहेत. विरियातो यांनी सुरुवातीपासून घेतलेली आघाडी कायम असून, धेंपे पिछाडीवर आहेत.

पण, निकालाने हादरलेल्या भाजपने दक्षिण गोव्यात फेरमतमोजणीची मागणी केली आहे.

आघाडीवर असणाऱ्या विरियातो यांच्यासह काँग्रेस व घटक पक्षाच्या नेत्यांनी मोठा जल्लोष केला. विरियातो यांनी यावेळी विजय सरदेसाई, वेंझी व्हिएगस, क्रुझ सिल्वा यांचे आभार मानले आहेत. याशिवाय त्यांनी सर्व गोंयकारांचे देखील आभार मानले आहेत.

आज पाच पांडवांनी कौरवांचा पराभव केलाय, आजचा विजय मनी पावर विरोधात लोकांचा विजय असल्याचे विरियातो म्हणाले. तर, भ्रष्ट सरकार आणि पक्षांतराच्या विरोधात हे मतदान झाल्याचे मत गोवा फॉरवर्डचे आमदार विजय सरदेसाई यांनी व्यक्त केले.

दक्षिणेत मोदींनी सभा घेतली मात्र या उमेदवाराचा पराभव झाला आहे. हा मोदींचा नैतिक पराभव असल्याचा उल्लेख देखील विरियातो यांनी केला. मनी पॉवरचा पीपल पॉवरने पराभव केल्याचे विरियातो म्हणाले.

भाजपने पल्लवी धेंपे यांना उमेदवारी जाहीर करत सर्वात जास्त लक्ष याच जागेवर दिले होते. पंतप्रधान नरेंद्र मोदी यांची सभा देखील दक्षिणेतच घेण्यात आली होती. मोदींना विरियातो आणि काँग्रेसवर सडकून टीका करत धेंपे यांना मतदान करण्याची मागणी केली. दरम्यान, भाजपने मोठी ताकद लावत धेंपेंचा प्रचार केला होता.

पण, दक्षिणेत अल्पसंख्याक मतदारांचा जलवा दिसून आला आहे. याचा सर्वाधिक फायदा विरियातो यांना झाल्याचे आकडेवारीतून दिसते.