मडगाव : कुडतरीसारख्या ख्रिश्चनबहुल मतदारसंघात स्थानिक भाजप मंडळाने पक्षाचे एकूण 33 कार्यक्रम राबविले. यासाठी भाजप प्रदेशाध्यक्ष सदानंद शेट तानावडे यांनी भाजपच्या मडगावातील कार्यालयात झालेल्या दक्षिण गोवा जिल्हा समितीच्या बैठकीत भाजपचे एसटी समाजाचे नेते अँथनी बार्बोझा आणि त्यांच्या टीमचे जाहीर कौतुक केले.

शुक्रवारी सायंकाळी मडगाव येथील जिल्हा कार्यक्रमात तानावडे यांनी १०० व्या ''मन की बात''चे यशस्वी आयोजन केल्याबद्दल कुडतरीचे भाजप नेते अँथनी बार्बोझा यांचे कौतुक केले, तसेच कुडतरी भाजप मंडळाचे अध्यक्ष नीळकंठ एकावडे, सरचिटणीस डॉ. स्नेहा भागवत यांच्यासह सर्व सदस्यांचे कौतुक केले. या कार्यक्रमाला बाणावलीचे माजी आमदार चर्चिल आलेमाव यांची उपस्थिती होती. यावेळी दक्षिण गोव्यातील अन्य मंडळांच्या कार्याचाही आढावा घेण्यात आला.