डिचोली: डिचोलीतील ‘गोठण’ परिसरात पुन्हा एकदा गव्यांचा संचार वाढला असून, शुक्रवारी ‘गोठण’ परिसरातील भर रस्त्याजवळ गव्यांचा एक कळप संचार करीत होता, अशी माहिती उपलब्ध झाली आहे. गव्यांचा पुन्हा संचार वाढल्याने ‘गोठण’ भागातून ये-जा करणाऱ्या लोकांमध्ये घबराट पसरली आहे.

शुक्रवारी सहा ते सात गवे ‘गोठण’ येथे मुख्य रस्त्यावरून जंगलाच्या दिशेने गेल्याचे निदर्शनास आले, अशी माहिती कृष्णानगर भागात राहणारे पापुराज मयेकर यांनी दिली.

या गव्यांनी परिसरात सध्या उच्छाद मांडला असून, बागायती पिकांची नासधूस सुरु केली आहे. लोकवस्तीजवळच कळपाने गवे संचार करीत असल्याने नागरिकांमध्ये घबराट पसरली आहे. बागायतदारही चिंतेत आहेत.

गव्यांच्या दहशतीमुळे लोकही रात्रीच्यावेळी घराबाहेर पडण्याचे धाडस करीत नाहीत. मिळालेल्या माहितीनुसार किमान सहा ते सात गवे कळपाने या परिसरात मुक्तपणे संचार करीत आहेत.

गव्यांची दहशत वाढण्यापूर्वीच वन खात्याने या गव्यांचा बंदोबस्त करावा, अशी मागणी जनतेकडून होत आहे. गेल्या काही महिन्यांपासून गोठण, लाखेरे भागात गव्यांचा संचार सुरु असल्याची माहिती मिळाली आहे.

जंगल सोडून गवे लोकवस्त्यांजवळ येण्यामागचे एक प्रमुख कारण म्हणजे घाट वा डोंगराळ परिसरात त्यांना खाद्य मिळणे दुरापास्त झाले आहे. खाद्याच्या शोधार्थ गव्यांनी आपला मोर्चा लोकवस्त्यांजवळ वळवला आहे. बहुतेक ग्रामीण भागात गव्यांचे अस्तित्व जाणवत आहे. - अमृत सिंग, प्राणीमित्र.