म्हापसा: हडफडे येथील बर्च क्लब दुर्घटना प्रकरणात अडकलेल्या संशयित अजय गुप्ता याला म्हापसा येथील न्यायिक दंडाधिकारी प्रथम वर्ग (JMFC) न्यायालयाने जामीन मंजूर केला आहे. अजय गुप्ता याच्यावर बर्च बाय रोमिओ लेन या नाईट क्लबसाठी अबकारी (उत्पादन शुल्क) खात्याचा परवाना मिळवताना बनावट कागदपत्रांचा वापर केल्याचा गंभीर आरोप होता.

साकवाडी-हडफडे येथील सर्व्हे क्रमांक १५९/० मधील घर क्रमांक ५०२/१ मध्ये चालणाऱ्या कंपनीच्या आस्थापनासाठी उत्पादन शुल्क परवाना मिळवण्याच्या उद्देशाने संशयितांनी समान हेतूने जाणूनबुजून कांदोळी प्राथमिक आरोग्य केंद्राची एनओसी तयार केली.

आरोपानुसार, अजय गुप्तानं हे प्रमाणपत्र अधिकृतपणे मिळवण्याऐवजी आरोग्य केंद्राच्या नावाने बनावट एनओसी तयार केली. यासाठी त्यांनी केंद्राच्या अधिकृत रजिस्टरमधील नोंदींमध्ये फेरफार केला आणि संबंधित अधिकाऱ्यांच्या बनावट स्वाक्षऱ्याही केल्या.

संशयितांनी तयार केलेली ही बनावट कागदपत्रे अबकारी खात्याकडे सादर करण्यात आली होती. मात्र, पडताळणी दरम्यान या प्रमाणपत्रावरील स्वाक्षऱ्या आणि रजिस्टरमधील नोंदी संशयास्पद आढळल्या.

संशयितांनी समान हेतूने जाणूनबुजून फसवणूक करण्याच्या उद्देशाने हा बनाव रचला होता. यामुळे केवळ आरोग्य केंद्रच नव्हे, तर अबकारी विभागाच्या अधिकाऱ्यांचीही दिशाभूल करण्यात आली होती. अखेर अजय गुप्ताला न्यायालयाकडून दिलासा मिळाला आहे.