पणजी: हडफडे येथील 'बर्च बाय रोमिओ लेन' या नाईटक्लबला लागलेल्या भीषण आगीच्या घटनेने राज्यासह संपूर्ण देशाला हादरवून सोडले होते. या आगीत 25 निष्पाप लोकांचा होरपळून मृत्यू झाला होता. याचप्रकरणी आता एक मोठी बातमी समोर आली आहे. या प्रकरणातील मुख्य आरोपी आणि नाईटक्लबचे मालक लुथरा बंधू अखेर गोवा पोलिसांच्या जाळ्यात अडकले. थायलंडमधून हद्दपार केल्यानंतर काही तासांतच ते दिल्लीच्या इंदिरा गांधी आंतरराष्ट्रीय विमानतळावर उतरले, जिथे गोवा पोलिसांनी त्यांना तात्काळ ताब्यात घेतले.

25 जणांचा मृत्यू आणि मालकांचे पलायन

हडफडे येथील 'बर्च बाय रोमिओ लेन' या नाईटक्लबमध्ये लागलेली आग ही गोव्याच्या इतिहासातील सर्वात भीषण दुर्घटनांपैकी एक मानली जात आहे. ज्यावेळी हा नाईटक्लब आगीत भस्मसात होत होता आणि आत अडकलेले लोक जीवाच्या आकांताने ओरडत होते, त्याचवेळी या क्लवचे मालक असलेले लुथरा बंधू जबाबदारी झटकून थायलंडला पसार झाले होते. या भीषण आगीत 25 जणांना आपला जीव गमवावा लागला.

बँकॉक पोलिसांची कारवाई आणि प्रत्यार्पण

नाईटक्लबमधील सुरक्षेच्या नियमांचे उल्लंघन आणि निष्काळजीपणामुळे इतक्या मोठ्या प्रमाणात जीवितहानी झाल्याचा ठपका ठेवत, गोवा पोलिसांनी लुथरा बंधूंवर सदोष मनुष्यवधाचा गुन्हा दाखल केला होता. ते परदेशात पळाल्याचे स्पष्ट होताच त्यांच्याविरोधात आंतरराष्ट्रीय स्तरावर हालचाली सुरु झाल्या होत्या. गेल्या काही दिवसांपासून त्यांना भारतात आणण्याची प्रक्रिया युद्धपातळीवर सुरु होती.

बँकॉक पोलिसांनी लुथरा बंधूंना ताब्यात घेतले होते. त्यानंतर दोन्ही देशांमधील कायदेशीर प्रक्रिया पूर्ण करण्यात आली. बँकॉक विमानतळावरुन या दोघांना डिपोर्ट करतानाचे व्हिडिओदेखील सोशल मीडियावर व्हायरल झाले होते. अखेर आज (16 डिसेंबर) दिल्ली विमानतळावर उतरताच गोवा पोलिसांनी त्यांच्या मुसक्या आवळल्या.